QMDB: Túrkistanda múftııattyń fılıaly ashylady

ASTANA. QazAqparat - Túrkistan qalasynda Qazaqstan musylmandary dinı basqarmasynyń arnaıy fılıaly ashylatyn boldy. Bul týraly sheshim búgin Astanada Bas múftı Serikbaı qajy Orazdyń tóraǵalyǵymen ótken QMDB-nyń kezekten tys Tóralqa májilisinde qabyldandy, dep habarlaıdy QazAqparat tilshisi. 

Alqaly jıynǵa QR Din isteri komıtetiniń tóraǵasy Erkin Ońǵarbaev, QMDB Birinshi naıb múftı Naýryzbaı qajy Taǵanuly, naıb múftıler - Alaý Ádilbaı, Baýyrjan Esmahan, QMDB apparat basshysy Ǵylymbek Májıev jáne oblystyń bas ımamdary qatysty.

«Túrkistan - búkil túrki jurtynyń temirqazyǵy, túrki musylmandyǵynyń ordasy, alty Alashtyń júregi! Túrkistan - babalar qaldyrǵan kıeli amanat, asyl dińgegimiz, rýhanı kindigimiz. Osynaý qasıetti jerde halqymyzdyń rýhanııaty úshin qyzmet etetin Qazaqstan musylmandary dinı basqarmasynyń arnaıy ókildigin ashýdy josparlap otyrmyz. Bul ortalyq Túrkistan óńiriniń odan ári rýhanı damýyna qyzmet etip, rýhanı astana mártebesiniń tereńdeı túsýine súbeli úlesin qosatyn bolady», - dedi Serikbaı qajy Oraz.

Óz kezeginde sóz alǵan QR Din isteri komıtetiniń tóraǵa orynbasary Balǵabek Myrzaev: «Túrkistan ejelden túrki áleminiń rýhanı ortalyǵy bolyp kelgen. Qazaqstan Respýblıkasynyń Prezıdenti - Elbasy Nursultan Nazarbaevtyń Túrkistan ataýyn qaıta jańǵyrtýy - ısi túrki halyqtary qalaǵan ıdeıany júzege asyrýynyń kórinisi dep aıta alamyz. Osyndaı kıeli jerde QMDB fılıalynyń ashylýy - elimizdegi rýhanı qundylyqtarynyń damı túsýine ózindik oń yqpalyn tıgizedi degen senimdemin», - dedi.

Tóralqa májilisiniń músheleri Bas múftıdiń Túrkistanda múftııattyń ókildigin ashý týraly usynysyn biraýyzdan qoldap, oń pikirlerin bildirdi.

Májilis qorytyndysynda Bas múftı Serikbaı qajy Orazdyń buıryǵymen Birinshi naıb múftı Naýryzbaı qajy Taǵanuly Qazaqstan musylmandary dinı basqarmasynyń Túrkistan qalasyndaǵy keńse basshysy bolyp taǵaıyndaldy