QMDB tótenshe jaǵdaı kezinde qoıylǵan suraqtarǵa jaýap berý úshin call-center ashty

NUR-SULTAN. QazAqparat – Qazaqstan musylmandary dinı basqarmasy tótenshe jaǵdaı kezinde suraqtarǵa jaýap berý úshin call-center ashty. Bul týraly Bas múftı Naýryzbaı qajy Taǵanuly málim etti, dep habarlaıdy QazAqparat tilshisi.

«Qazir biz elimizdegi tótenshe jaǵdaı kezinde halyqqa úmit shýaǵyn shashyp, olardy jigerlendirip, ımanyn kúsheıtip, qulshylyǵyn arttyrý maqsatynda onlaın nasıhat aıtyp, ınternet jelisi arqyly arnaıy dáristerdiń kestesin bekittik. Sonymen qatar, jamaǵattyń suraǵyna der kezinde jaýap berý úshin call-center ashtyq. Onyń nómiri – 33-30-30. Ortalyqqa Nur-Sultan qalasynyń kody arqyly telefon shalýǵa bolady. Ortalyqta din salasynyń bilikti mamandary táýlik boıy qazaq jáne orys tilindegi suraqtarǵa jaýap beredi», - dedi Bas múftı Ortalyq kommýnıkatsııalar qyzmetindegi brıfıngide.

Osy rette ol naýqas jandarǵa medıtsınalyq kómek kórsetip júrgen dárigerlerge, qaýipsizdik sharalarynyń alǵy jebindegi ishki ister jáne qorǵanys salasynyń qyzmetkerlerine, halyqqa obektıvti aqparat taratyp otyrǵan BAQ ókilderine, qaıyrymdylyq sharasyna belsendi túrde atsalyp júrgen barsha erikti azamattarǵa alǵysyn aıtty.

«Halqymyzda «Qaıyrymdylyq jasasań – qaıyryn óziń kóresiń» degen naqyl sóz bar. Dinı basqarmanyń negizgi jumys baǵyttarynyń biri – qaıyrymdylyq. Men jurtymyzǵa joldaǵan Úndeýimde karantın kezinde úmitsizdikke boı aldyrmaı, saýapty amaldar men qaıyrymdylyq sharalarǵa úles qosýǵa shaqyrdym. Osy Úndeýden keıin din qyzmetkerleri karantın kezinde 17 643 otbasyna kómek kórsetti. Sonymen qatar juqpaly indettiń aldyn alý maqsatynda halyqqa karantın kezinde 47 821 dana betperde tarattyq. Betperde meshitterimizdegi tigin sheberhanalarynda tigildi. Qalǵan bóligi demeýshilerdiń kómegimen jetkizildi», - dedi Bas múftı.

Osy oraıda ol ıgi bastamaǵa úles qosqan barsha din qyzmetkerlerine, demeýshi azamattarǵa rızashylyn bildirdi.

«Biz qashan da ózgelerge qaıyrymdylyq jasap, jan-jaǵymyzǵa shýaǵymyzdy tógip, sharapatymyzdy tıgizip, adamnyń alǵysyn alyp ósip-óngen elmiz», - dedi Naýryzbaı qajy Taǵanuly.

Budan buryn habarlanǵandaı, Naýryzbaı qajy Taǵanuly bıyl elimizde Ramazan aıy 24 sáýir kúni bastalatynyn aıtty.

https://kaz.inform.kz/news/biyl-ramazan-ayy-24-sauir-kuni-bastalady-bas-mufti_a3637939

Sonymen qatar meshitterde, qoǵamdyq oryndarda aýyzashar berý ýaqytsha toqtatylatyny túsindirildi.

https://kaz.inform.kz/news/meshitterde-kogamdyk-oryndarda-auyzashar-beru-uakytsha-toktatylady_a3637946