QMDB «Islam entsıklopedııasy» kitabynyń alǵashqy tomyn jaryqqa shyǵardy

<p>ASTANA. KAZINFORM &ndash; Qazaqstan musylmandary dinı basqarmasy &laquo;Islam entsıklopedııasy&raquo; kitabynyń alǵashqy tomyn jaryqqa shyǵardy. Elimizge belgili 50-ge jýyq ǵalymnan quralǵan jumys tobynyń kómegimen ǵylymı negizdemesi bar &laquo;Islam entsıklopedııasy&raquo; jasaqtaldy.&nbsp;</p>

Eńbekte Islam qundylyqtaryn yqshamdap jazýǵa nazar aýdaryldy jáne Islam tarıhy men órkenıeti, mádenıeti men ádebıeti, sonymen qatar kúlli musylman halqyna ortaq uǵymdar men ataýlar qamtyldy.

Uly Dala tósindegi Islam tarıhynan bastap (Qarahan memleketi, Altyn Orda, Qazaq handyǵy, Alashorda úkimeti, Keńes zamanyndaǵy jáne Táýelsiz Qazaqstan), qazaq topyraǵynan shyqqan tarıhı tulǵalar, din qaıratkerleri, qasıetti jerler men kıeli mekender týraly maǵlumattar da engizilgen. Qazaqtyń dinı-aǵartýshylyq salasynda óz izin qaldyrǵan ahýndar, ıshandar, qazılar, múftıler, ımamdar týraly derekter jazylǵan. 

«Memleket basshysy «Halqymyzdyń dúnıetanymyna saı dástúrli ıslamdy dáripteý asa mańyzdy. Onyń ǵylymı-teorııalyq negizin damytý qajet», - degen bolatyn. Oqyrmanǵa jol tartqan «Islam entsıklopedııasy» kitaby – dástúrli dinimizdiń ǵylymı-teorııalyq negizin damytýǵa baǵyttalǵan Qazaqstan musylmandary dinı basqarmasynyń aýqymdy jobasynyń biri bolmaq. Árıne buǵan deıin elimizde Islam dini jaıly túrli entsıklopedııalar jaryq kórdi. Dinı basqarma daıyndaǵan «Islam entsıklopedııasynyń» ereksheligi – Islam dinine arnalǵan elimizdegi alǵashqy kóptomdyq entsıklopedııa bolǵaly tur», - dedi Bas múftı Naýryzbaı qajy Taǵanuly kitap tusaýkeserinde. 

QMDB tóraǵasynyń aıtýynsha, «Islam entsıklopedııasy» eńbeginiń 5 tomyn shyǵarý kózdelgen. 

Aıta keteıik, «Islam entsıklopedııasy» dinı sala qyzmetkerleri men izdenýshi shákirtter, ǵalymdar jáne jalpy oqyrman qaýymǵa arnalǵan.