QMDB ǵımaratynyń aýlasynda balalarǵa arnalǵan oıyn alańy boı kóterdi

ASTANA. 3 maýsym. QazAqparat - Búgin Qazaqstan musylmandary dinı basqarmasy ornalasqan ǵımarattyń aýlasynda balalarǵa arnalǵan oıyn alańynyń tusaýy kesildi.

QMDB-nyń baspasóz qyzmetinen habarlaǵandaı, alań 1 maýsym - Halyqaralyq balalardy qorǵaý kúnine oraı ashyldy.

«Meshit aýlasyna dastarhan jaıylyp, búldirshinderge syılyqtar taratyldy. Ónerli jigitterdiń qatysýymen teatrlandyrylǵan kórinister qoıyldy. Balýandar kúresip, qyzyqty oıyndar uıymdastyryldy. Jetim balalar da nazardan tys qalmady. Ata-ananyń aıaly alaqanynan aıyrylǵan 100-ge jýyq balanyń kóńili shattyqqa bólendi. Dinı basqarmanyń atynan olarǵa arnaıy syı-sııapattar berildi», - delingen habarlamada.

Bas múftı Erjan qajy Malǵajyuly memleketimizdiń bolashaǵy sanalǵan búldirshinderdi aıtýly merekelerimen quttyqtaı kele, ata-analardy urpaq tárbıesine jiti kóńil bólýge shaqyrdy.

Sondaı-aq QMDB tóraǵasy Almaty oblysy Talǵar aýdanynda bir emes, birneshe jetim búldirshinderdi qamqorlyǵyna alyp, tárbıelep, ósirip kele jatqan Tuıaq ájege qasıetti Quran Kárimdi syıǵa tartty. Іs-sharaǵa jınalǵan ata-analar Qazaqstan musylmandary dinı basqarmasynyń, Bas múftıdiń ıgilikti bastamasyna rızashylyqtaryn bildirip, alǵystaryn jaýdyrdy.

Búginde Bas múftı tapsyrmasymen elimizdiń barlyq meshitterinde balalar merekesine oraı qaıyrymdylyq aktsııalar, rýhanı kontsertter, tárbıelik máni mol is-sharalar júzege asyrylýda.