QMDB aýrýhana qyzmetkerlerine medıtsınalyq jabdyqtar men azyq-túlik sebetterin syılady
Igi shara Ramazan aıy men Táýelsizdiktiń 30 jyldyǵyna oraı uıymdastyrylyp otyr. Dinı basqarma Nur-Sultan qalasynyń №1 aýrýhanasyna medıtsınalyq jabdyqtar men azyq-túlik sebetterin tabystady.
«Qadirli baýyrlar, qurmetti aq halatty abzal jandar! Eń birinshi sizderge óz atymyzdan, múftııat atynan alǵys aıtqymyz keledi. Іndet álemdik deńgeıde ýshyǵyp turǵanda sizder aldyńǵy qatarda júrdińizder, qazir de elge qyzmet etýdi jalǵastyryp júrsizder. Aldymen Alladan sizderdiń amandyqtaryńyzdy tileımin. Ýaǵyz-nasıhatymyzda da halyqqa dárigerlerdiń eren eńbegin aıtyp jatyrmyz. Búgin múftııat ujymymen birge Ramazannyń syılyǵyn berýge keldik. Bul – sizderge amalmen, ispen kórsetken rahmetimiz», - dedi QMDB Tóraǵasy, Bas múftı Naýryzbaı qajy Taǵanuly.
QMDB bıylǵy jyl basynda 7 baǵyttaǵy jumysqa basymdyq beretinin aıtqan edi. Sonyń biri – qaıyrymdylyq baǵyty.
«Emhanada emdelip jatqan baýyrlarymyzǵa kómegimiz tısin degen maqsatta 3 ottegi kontsentraty apparatyn jáne 30 dana pýlsoksımetr, 30 dana tynys alýǵa jabdyǵyn tabystap otyrmyz. Al 150 dana azyq-túlik sebeti «Berekeli Ramazan syıy» aktsııasymen aýrýhana qyzmetkerlerine beriledi. Buǵan deıin de qaıyrymdylyq sharalaryn jasap kelgen bolatynbyz, ári qaraı da ıgi sharalardy jalǵastyramyz», - dedi Bas múftı.
Dinı basqarmanyń habarlaýynsha, indet kezinde «Ómirge úmit syıla» aktsııasy aıasynda byltyrdan beri 67 aýrýhanaǵa 425 mln teńgeniń kómegi kórsetilgen. Onda ókpendi jasandy jeldetý apparattary, ottegi kontsentrattary, maska jáne qorǵanysh kıimderi berilgen.