QMDB 45 rásimdi ótkizýdiń biryńǵaı standartyn bekitti

NUR-SULTAN. QazAqparat – Qazaqstan musylmandary dinı basqarmasy barlyq 45 rásimdi ótkizýdiń biryńǵaı standartyn bekitti. Bul týraly Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Sońǵy ýaqytta bizdiń azamattardyń dinge bet buryp kele jatqanyn erekshe atap ótý kerek. Sondyqtan, azamattardy rýhanı turǵyda tárbıeleýde dinniń orasan zor rólin jasyrý – aqymaqtyq bolar edi. Osyǵan baılanysty, Qazaqstan musylmandary dinı basqarmasynda, álbette, Islamdy barlyq baǵytta damytýdaǵy jumysty durys uıymdastyrýda úlken jaýapkershilik bar. Ol degenińiz – medresede oqytý, ártúrli rásimderdi durys ótkizý, qaıyrymdylyq jasaý, eń bastysy azamattarǵa kómek berý sekildi mańyzdy sharýalar. Alaıda zaıyrly sanatqa óte otyryp, kel kelgen ınstıtýttyń tıimdi jumysy úshin árıne, birneshe qaǵıdatty ustaný kerek. Ol qaǵıdattardyń biri – birkelkilik. Kúni keshe ımamdar forýmynda birneshe mańyzdy qujat qabyldandy. Ol qujattar QMDB-nyń bul qaǵıdatty jumysyn kúsheıtýge baǵyttalǵan», - dedi Dáýren Abaev «Ashyq dıalog» baǵdarlamasynda.

Mınıstrdiń aıtýyna qaraǵanda, «Jeti rýhanı tirek» atty musylmandardyń rýhanı alańynda negizgi qundylyqtar bekitiledi.

«Ol – adamgershilik, patrıottylyq, birlik, eńbeksúıgishtik jáne t.b. Halyqpen jumys júrgizýde mine, osy qasıetter negizgi baǵyttar bolmaq. Ekinshiden, bul – din qyzmetkerleri atqaratyn dinı rásimderdiń reestri. Dinı rásimder adamdardyń búkil ómir jolynda aldynan shyǵady. Búgingi taldaý jumystary kórsetip otyrǵandaı, eldiń ártúrli óńirinde belgili bir rásimdi ótkizerde aıtarlyqtaı aıyrmashylyq bar. Sol sebepti, QMDB barlyq 45 rásimdi ótkizýdiń birkelki standartyn bekitti. Úshinshisi – dinı laýazymdar reestri. Bul jerde áńgime laýazymdyq nusqaýlar, medrese tyńdaýshysynan Bas múftıge deıingi aralyqtaǵy mindettemeleri týraly aıtylyp otyr. Meniń oıymsha, bul – bizdiń elimizdegi dinı qarym-qatynastardy júıelendirýge baǵyttalǵan qujattar paketi. Jalpy, munyń bári de atalǵan saladaǵy jaǵdaıdy jaqsarta túserine senemin», - dedi ol.

Eske sala ketsek, keshe elordada «Rýhanı qundylyqtar – qoǵam birliginiń negizi» atty ІІІ respýblıkalyq ımamdar forýmy ótken bolatyn. Prezıdent Qasym-Jomart Toqaev forým qatysýshylaryna quttyqtaý hatyn joldady.