QMDB-30: Aı saıyn 30 adamǵa tegin em-dom jasalady
QMDB baspasóz qyzmetiniń málimetinshe, elordada Bas múftı Naýryzbaı qajy Taǵanuly Halyqaralyq «Jas-Aı» medıtsına ortalyǵynyń bas dırektory ári bas dáriger Jasan Zekeıulyn qabyldady. Kezdesýde halyqtyń táni men janyn emdeýdiń mańyzdylyǵy, saýapty sharalarǵa úles qosýdyń máni týraly sóz boldy.
«Ardaqty Paıǵambarymyz (oǵan Allanyń salaýaty men sálemi bolsyn): «Aralaryńda eń jaqsylaryń – aınalasyna paıdaly bolǵandaryń» degen. Halyqty emdeý isinde kóp jumys atqaryp kelesizder. Halyqqa qyzmet etýden asqan ǵazız nárse joq. Alla Taǵala el ıgiligi jolyndaǵy isterińizge mol saýaptan jazsyn», - dep atap ótti Bas múftı.
Óz kezeginde Jasan Zekeıuly: «Medıtsınanyń negizin qalaǵan, álemge máshhúr musylman ǵulamasy Ábý Álı ıbn Sına babamyz: «Aýrýdy emdeýdegi dárigerdiń úsh quraly bolady. Ol – jyly sóz, shóp jáne dáriger qandaýyry» degen eken. Sizder halyqtyń rýhyn emdep júrseńizder, biz, dárigerler azamattarymyzdyń táni men janyna shıpa izdeımiz. Sondyqtan bizdiń maqsatymyz bir. Birlesip atqaratyn isimiz kóp», - dedi.
Kezdesýde Qazaqstan musylmandary dinı basqarmasynyń «30 jyldyq mereıtoıǵa – 30 ıgi shara» aıasynda 30 adamǵa tegin em-dom jasaý jumysy jan-jaqty talqylandy.
Halyqaralyq «Jas-Aı» medıtsına ortalyǵynyń bas dırektory Jasan Zekeıuly bul bastamaǵa qoldaý kórsetetinin málimdep, múftııattyń nusqamasymen Nur-Sultan, Almaty, Shymkent qalalarynan aı saıyn 10 adamdy, barlyǵy 30 azamatty tegin emdeýge ýáde berdi. Taraptar osy bastama aıasynda ortaq ıgi jobalardy júzege asyrýǵa ýaǵdalasty.