Klızma qalpaqshasyn balanyń tik isheginde qaldyrǵan aqtóbelik medbıke jazalandy

Aqtóbede aýrýhanaǵa túsken sábıge klızma jasaǵan medbıke onyń tik isheginde medıtsınalyq qural bólshegin qaldyrǵan. Klızmanyń qalpaqshasyn naýqastyń anasy bala úlken dáretke barǵan kezde bir-aq kóredi. Aqtóbe oblystyq aýrýhanasynyń medbıkesi tártiptik jazaǵa tartyldy, dep habarlaıdy QazAqparat tilshisi.

Oqıǵa Aqtóbe oblystyq balalar aýrýhanasynda boldy. Sábı synap jutyp qoıyp, ýlanyp qalǵan. Sol kezde medbıkege klızma jasaý tapsyrylady.

«Medbıke bizde eki aıdan beri jumys istep jatyr. Jas maman. Mynadaı oqıǵa bolǵan soń tekserý júrdi. Bala eki jasta. Klızma jasaǵan kezde qalpaqshasy kirip ketken. Qorqyp, eshkimge aıtpaǵan. Tekserip, anyqtaldy. Bala úshin qaýipti emes. Úlken dáretimen shyqty. Qazir bala úıinde. Eshqandaı shaǵym joq», - dedi Aqtóbe oblystyq balalar aýrýhanasynyń bas dárigeri Erbol Japaqov.

Onyń aıtýynsha, oqıǵadan soń bólimniń bas medbıkesine, sonymen birge jas mamanǵa sógis berildi. Qazirgi kezde jas maman biliktiligin arttyrýǵa jiberildi.

Buǵan deıin habarlaǵanymyzdaı, Aqtóbede ógeı áke-shesheniń tárbıesindegi balalar erekshe baqylaýǵa alyndy. Taıaýda Bas prokýratýra «E-preventsııa» jobasyn tanystyrdy.