Klınıkalyq ólim: Jambyl oblysynda sarbaz jansaqtaý bólimine tústi

<p>TARAZ. KAZINFORM — «Ońtústik» óńirlik qolbasshylyǵynyń sarbazy Qordaı ortalyq aýdandyq aýrýhanasynyń jansaqtaý bólimine tústi. </p>

Oqıǵa 9 maýsym kúni bolǵan.

Jambyl oblystyq densaýlyq saqtaý basqarmasy baspasóz qyzmetiniń bergen málimetine súıensek, sarbazdyń jaǵdaıy ázirge áli de aýyr jaǵdaıda.

«Naýqas 9 maýsym kúni Gvardeısk áskerı gospıtalinen jedel járdem kóligimen jetkizildi. Qordaı ortalyq aýdandyq aýrýhanasyna „polısegmentaldy pnevmonııa“ dıagnozymen jatqyzyldy. Oń jaqta plevrıt. 3-4 dárejeli juqpaly toksıkalyq shok. Sepsıs. Mıdyń gıpoksııalyq isinýi, tserebraldy koma 2-3. DVS sındromy. Naýqas klınıkalyq ólimdi bastan keshken. Qazirgi ýaqytta naýqastyń jaǵdaıy óte aýyr, kóptegen músheler jetkiliksizdigi baıqalady. Atap aıtqanda, tynys alý, júrek, baýyr, tserebraldy jáne ınfektsııalyq toksıkalyq shok belgileri bar. Gemofıltratsııa jáne dári-dármekpen emdeledi», — delingen baspasóz relızinde. 

Esterińizge sala keteıik, buǵan deıin Ulttyq ulan áskerı bólimderiniń birinde áskerı boryshyn ótep júrip, mert bolǵan sarbazdyń máıitine eksgýmatsııa jasalyp, ólimniń shyn máninde neden bolǵany anyqtalǵanyn jazǵan bolatynbyz.