Klımattyń ózgerýi búkil álemdegi daýyldyń jyldamdyǵyn ortasha eseppen 29 km/saǵ-qa arttyrdy

<p>ASTANA. KAZINFORM &ndash; Ǵalymdar klımattyń ózgerýi daýyldy jyldamdatady degen qorytyndyǵa keldi: sońǵy alty jylda Atlantıkalyq daýyldyń jyldamdyǵy orta eseppen 29 km/saǵ artty. Bul muhıt sýlarynyń jylynýymen baılanysty, dep habarlaıdy <a href="https://t.me/BILD_Russian/20010" target="_blank" rel="noopener">BILD</a>.</p>

Environmental Research: Climate jýrnalynda jarııalanǵan zertteý 2019 jyldan 2023 jylǵa deıin jel jyldamdyǵynyń artýyna baılanysty 40 daýyl Saffır-Sımpson shkalasy boıynsha bir sanatqa kóterilgenin kórsetti.

- Atlant muhıtynyń temperatýrasy Tselsıı boıynsha 2-3 gradýsqa, keı jerlerde 4 gradýsqa deıin jylynǵan. Daýyldar jyly sýdan órshı túsedi, bul onyń kúshin arttyrady, - deıdi zertteýdiń jetekshi avtory, klımattanýshy Denıel Gıfford.

Onyń aıtýynsha, 5-sanattaǵy daýyl 1-sanattaǵy daýylǵa qaraǵanda shamamen 400 ese kóp shyǵyn ákeledi.

Bıylǵy eń joıqyn daýyldyń qatarynda klımattyń ózgerýine baılanysty 26-39 km/saǵ kúsheıgen Berıl, Helen jáne Mılton daýyldary bar. AQSh-tyń Ulttyq muhıt jáne atmosferalyq basqarmasy klımattyń ózgerýi daýyldyń bir-birimen ózara árekettesýine de áser etetinin atap ótti, mysaly, tornadolar serııasyn týdyrǵan Mılton daýyly.