Klıentterdiń aqshasyn urlaǵan aqtóbelik bankır ustaldy
14:03, 07 Qyrkúıek 2017
AQTÓBE. QazAqparat - Aqtóbede bank sýpervaızeri bir jyl boıy klıentterdiń esepshotyndaǵy aqshany ózine aýdaryp alyp otyrǵan, dep habarlaıdy QazAqparat tilshisi.
Aqtóbe oblysyndaǵy ekinshi deńgeıli bank basshysy polıtsııaǵa shaǵym túsirdi. Bank qyzmetkeri 1 jyl boıy klıentterdiń esepshotyndaǵy qarjyny óz esepshotyna aýdaryp kelgen.
«Bank sýpervaızeri qyzmettik múmkindikterin paıdalanyp klıentterdiń jáne bank shotynan qarjy urlap kelgen. Osy derek boıynsha 35 jastaǵy qala turǵyny ustaldy. Ol qarjynyń bárin jeke shotyna aýdaryp otyrǵan. Keltirilgen zalal - 2 mıllıon 685 myń teńge»,- dep habarlady oblystyq ІІD baspasóz qyzmeti.
Aıta keteıik, osy derekke qatysty Qylmystyq kodekstiń «Senip tapsyrǵan bóten múlikti ıemdenip alý nemese talan-tarajǵa salý» baby boıynsha is qozǵaldy. Tergeý júrip jatyr.