Klaýs Shvab Qazaqstanda Tórtinshi ónerkásiptik revolıýtsııa ortalyǵyn qurýdy usyndy

ASTANA. QazAqparat - «Astana» Halyqaralyq qarjy ortalyǵynyń (AHQO) basqarýshysy Qaırat Kelimbetov Jeneva qalasynda  Dúnıejúzilik ekonomıkalyq forýmnyń (DEF) atqarýshy tóraǵasy jáne negizin qalaýshy Klaýs Shvabpen kezdesti, dep habarlaıdy QazAqparat QR SІM baspasóz qyzmetine silteme jasap. 

Kezdesýge Qazaqstan Respýblıkasynyń BUU jáne basqa da halyqaralyq uıymdar janyndaǵy turaqty ókili Janar Aıtjanova qatysty.

Kelissózder barysynda Q.Kelimbetov DEF-tyń jahandyq deńgeıdegi jumysynyń mańyzyn, sondaı-aq Qazaqstannyń osy uıymmen yntymaqtastyqty odan ári nyǵaıtýǵa degen qyzyǵýshylyǵyn atap ótti. Ol sondaı-aq, AHQO-nyń strategııalyq baǵyttary týraly egjeı-tegjeıli habardar etip, onyń qurylýy qolaıly ınvestıtsııalyq klımat qurý jáne halyqaralyq bıznes standarttaryn biriktirýge baǵyttalǵan Qazaqstannyń ekonomıkasyn ártaraptandyrý úshin qurylymdyq reformalardyń bir bóligi bolyp tabylatynyn atady.

Óz kezeginde DEF Atqarýshy Tóraǵasy DEF-tiń Qazaqstanmen yntymaqtastyǵynyń mańyzdylyǵyn jáne Qazaqstannyń Ortalyq Azııadaǵy jetekshi rólin atap ótti.

Budan basqa, K. Shvab Qazaqstanda AHQO negizinde Ortalyq Azııa úshin Tórtinshi ónerkásiptik revolıýtsııa ortalyǵyn qurýdy usyndy. San-Frantsısko qalasynda jumys isteıtin osyndaı DEF ortalyǵy jańa tehnologııalardy, jasandy ıntellekt, blok-tehnologııalardy jáne basqa da qazirgi zamanǵy tehnologııalardy damytýǵa basa nazar aýdarady.

K.Shvabtyń aıtýynsha, Ortalyq Azııa aımaǵynda uqsas ortalyq qurý qurlyqtardy qosyp qana qoımaı, ártúrli perspektıvti ortalyqtarmen baılanystyrady jáne ortalyqtardyń jahandyq deńgeıdegi negizgi ıdeıalaryn júzege asyrýǵa múmkindik beredi.