Klassıkalyq shahmattan álem chempıonaty Qazaqstanda tuńǵysh ret ótedi

ASTANA. QazAqparat - Klassıkalyq shahmattan álem chempıonaty tuńǵysh ret Qazaqstanda ótedi. Bul jaıynda QR Mádenıet jáne sport mınıstri Arystanbek Muhamedıuly Feısbýktegi paraqshasynda jazdy, dep habarlaıdy QazAqparat tilshisi.

"Klassıkalyq shahmattan álem chempıonaty tuńǵysh ret elimizde ótedi! Bul - qazaqstandyq shahmat mektebiniń damý jolyndaǵy tarıhı kezeń! Bizdiń shahmatshylarymyz úshin óte mańyzdy oqıǵa! Chempıonattyń Qazaqstanda bolatynyna búkil álem qyzyǵa qarap otyr. Osy saıystyń ótýine ERG kompanııalary toby úles qosyp, qoldaý kórsetti", - dep jazdy ol.

Mınıstrdiń dereginshe, 5-14 naýryz aralyǵynda (10 naýryz demalys kúni) AHQO ǵımaratynda (Astana, Máńgilik el, 55/18, S-3.3 pavılony) chempıonattyń barlyq 9 týry (kúnine bir týr) uıymdastyrylady. Týrnırlerdiń bári saǵat 15:00-de bastalady. Tek sońǵy, toǵyzynshy týr saǵat 12:00 ótedi.

Týrnırge Ázerbaıjan, Armenııa, Ulybrıtanııa, Vengrııa, Grýzııa, Egıpet, Úndistan, Iran, Qytaı, AQSh, Reseı, Ýkraına, Shvetsııa jáne Qazaqstannan 20 qurama - 10 áıelder, 10 erler komandalary qatysady. Álem chempıondary, FIDE 2018 Olımpıadasy nátıjesi boıynsha reıtıngi joǵary 6 komanda keledi. Qabyldaıtyn federatsııadan eki komanda, FIDE prezıdenti taǵaıyndaǵan eki komanda chempıonatta óner kórsetedi.

"Osy keremet oıyndy jaqsy kóretinderdi bizdiń quramanyń jankúıeri bolýǵa shaqyramyz! Kirý tegin! Barshańyzdy kútemiz!", - dep jazady Arystanbek Muhamedıuly.