KQK munaı qubyrynyń 400 shaqyrymǵa jýyq jelilik bóligi aýystyrylmaq

ASTANA. QazAqparat - 2023 jylǵy 16 maýsymda XXVI Sankt-Peterbýrg Halyqaralyq ekonomıkalyq forýmy (SPHEF-2023) sheńberinde Qazaqstannyń Energetıka mınıstri Almasadam Sátqalıev KQK bas dırektory Nıkolaı Gorbanmen kezdesý ótkizdi, dep habarlaıdy QR Energetıka mınıstrliginiń baspasóz qyzmeti.

Qazaqstannyń Energetıka mınıstri 2023 jyly KQK jumysynyń nátıjeleri jáne kompanııanyń jaqyn aradaǵy óndiristik josparlary týraly habardar boldy. Jyl sońyna deıin Teńiz – Novorossıısk qubyr júıesiniń ótkizý qabiletin 82 mıllıon tonnaǵa deıin túsirgengen jińishke jerlerdi joıý baǵdarlamasy (QJJB) tolyǵymen aıaqtalady.

Jyl basynan bastap búgingi kúnge deıin KQK 29,5 mln tonnany tasymaldap, olardy 272 tankerge tıedi, al boljamǵa sáıkes jyl boıynsha jalpy kórsetkish shamamen 60-61 mln tonnany quraıdy dep kútilýde. Ótken jyly KQK eksportqa 58,7 mln tonna munaı tıep jóneltti.

Aldaǵy úsh-tórt jyldyń keleshegi týraly aıta kele, KQK basshysy Nıkolaı Gorban KQK munaı qubyrynyń 400 shaqyrymǵa jýyq jelilik bóligin aýystyrý boıynsha aýqymdy jumys kútip turǵanyn atap ótti. Bul halyqaralyq munaı tasymaldaý kompanııasy obektileriniń senimdiligi men ónerkásiptik qaýipsizdigin aıtarlyqtaı arttyrýǵa múmkindik beredi.

Áńgimelesý barysynda qazirgi ýaqytta KQK álemdik energııa qaýipsizdiginiń mańyzdy quramdas bóligi bolyp tabylatyny atap ótildi. Konsortsıým álemdik naryqtarǵa Qazaqstan munaıynyń eksporttyq kóleminiń 80%-ǵa jýyǵyn jetkizedi, ol úshin eń qaýipsiz, logıstıkalyq turǵydan tekserilgen jáne ekonomıkalyq tıimdi baǵyt bolyp tabylady.