Qyzyljar aýdanynda 16 otbasy qujattarynyń durys bolmaýynan baspana ala almaı júr

<p>PETROPAVL. KAZINFORM &ndash; Soltústik Qazaqstan oblysy Qyzyljar aýdanynda tasqynnan zardap shekken 1067 otbasy búlingen múlki úshin 369 mln teńge ótemaqy aldy. Jergilikti bılik jylytý maýsymy bastalǵansha barlyǵyn baspanamen qamtýdy josparlap otyr.</p>

Oblystyq qoǵamdyq keńeste tasqynnan zardap shekkenderdiń máselesi qaraldy. Qyzyljar aýdanynda ǵana 14 eldi meken sý astynda qaldy. Saldarynan 1546 úı zaqymdandy.

Qyzyljar aýdany ákiminiń orynbasary Alma Nurǵalıevanyń aıtýynsha, qazirgi ýaqytta 1387 úı boıynsha jumys júrgizilip jatyr, sonyń ishinde 407 baspana apatty dep tanyldy.

«980 úıde qalpyna keltirý jumystary júrgizilýi qajet, onyń basym bóliginde qurylys júrip jatyr. 28 turǵyn úı ıelerimen másele bar. Olardyń beseýimen shetelde júrýine baılanysty habarlasa almaı otyrmyz, qalǵandarynyń qujattary tolyq emes, olardyń altaýy mine qujattaryn istetti. Bul úılerdiń 13-in jóndep, qalǵan 15-in buzý qajet.

1067 baspana ıesi 150 AEK mólsherinde búlingen múlki úshin ótemaqy aldy. Olarǵa jalpy somasy 369 mln teńge tólendi», - deıdi Alma Nurǵalıeva.

Mamannyń aıtýynsha, «Qyzyljar Asar» qory 905 úıdiń jóndeý-qalpyna keltirý jumystaryna 5 mlrd jýyq teńge bóldi. Árqaısysyna ortasha eseppen 5 mln 200 myń teńge shamasynda berildi.

«Búginge deıin 274 baspana satyp alyndy. Úılerdiń ortasha baǵasy – 15 mln teńge shamasynda.

40-qa jýyq otbasy Petropavlǵa qonys aýdaryp, «Birlik» shaǵyn aýdanynan jańa úı aldy. Qazirgi ýaqytta 99 otbasynyń máselesin sheshý qajet. Olardyń 25-ine páter alynsa, qalǵan 74-ine «Birlik» shaǵyn aýdanynan jańa baspana beriledi», - deıdi Alma Nurǵalıeva.

Qazirgi ýaqytta Qyzyljar aýdanynda 7 mehanıkalandyrylǵan brıgada jumys istep jatyr. Olar baspanalardy qalpyna keltirýmen qatar 300-ge jýyq úıdi buzdy, mamyr aıynan beri 24 myń tekshe metr qoqys shyǵardy.

Buǵan deıin SQO-daǵy sý qoımalarynyń jaǵdaıy tasqynnan keıin komıssııalyq tekseristen ótkenin jazǵan edik.