Qyzylshaǵa qarsy vaktsınaǵa Úkimet rezervinen aqsha jumsalady

<p>Úkimet rezervinen qyzylshaǵa qarsy 1 mln doza ekpe satyp alynady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Bul týraly Sanıtarııalyq-epıdemıologııalyq baqylaý komıteti tóraǵasynyń orynbasary Záýre Ahmetova ortalyq kommýnıkatsııalar qyzmetinde ótken baspasóz konferentsııada aıtty.

«Qazan aıynyń aıaǵynda bizde qyzylshaǵa qarsy 370 myń doza vaktsına bolǵan. Qosymsha ımmýnızatsııaǵa 1,5 mln adam jatatynyn eskerý qajet. Bul – jasy 60 aıdan aspaǵan 353,7 myń náreste, 2-4 jas aralyǵyndaǵy 944 myń bala. Ekpe alatyn jasynda vaktsına almaǵan 65,3 balaǵa ekpe jasaý kerek. Odan bólek 136,8 myń medıtsına qyzmetkeri bar. Sondyqtan Úkimet rezerviniń qarajatyna taǵy 1 mln doza ekpe men shprıts satyp alynady. Budan bólek 500 myń doza satyp alynǵan. Osy aıdyń ortasyna qaraı qolymyzǵa tııýi kerek», - dedi komıtet ókili.

BAQ ókili halyq ishinde qyzylsha ekpesine degen senim tómen bolsa, munsha vaktsına satyp alý qanshalyqty tıimdi ekenin surady.

«Men olaı pessımıstik turǵyda oılamaǵan bolar edim. Óıtkeni qazir balasyna ekpe salǵyzýshylar kóp. Búginniń ózinde jasy 6-11 aı aralyǵyndaǵy 14 myńnan astam bala vaktsına aldy», - dedi Záýre Ahmetova.