Qyzylordalyq jas ónertapqysh zaǵıp jandarǵa arnalǵan mobıldi qosymsha jasady

<p>QYZYLORDA. KAZINFORM - Qyzylordalyq jas ónertapqysh Azamat Ibragım zaǵıp jandarǵa arnap jasaǵan &laquo;Janarym AI&raquo; mobıldi qosymshasyn jasap shyǵardy.</p>

Ónertapqyshtyń atalǵan jobasy oblystyq «Smart city Kyzylorda» IT jobalar baıqaýynda «Ázirleý baǵyty» boıynsha 3-orynǵa laıyqty dep tanyldy.

«Mobıldi qosymsha arqyly turǵyndar volonterge vıdeoqońyraý, aqyldy kamera, ınklıýzııa akademııasy, ınklıýzıvti qoǵamdastyq syndy biregeı fýnktsııalarǵa ıe bolady. Úlken volonterlik júıeni qalyptastyrý jolynda, eriktilerdi yntalandyrý joly qarastyrylǵan. Bul maqsatta bonýstyq júıe oılastyrylǵan», - dedi ol.

Jobanyń ınteraktıvti, sandyq prototıpi daıyndaldy. Aldaǵy ýaqytta atalǵan jobanyń tehnıkalyq ázirleý satysy ázirlenedi. Sol arqyly erekshe jandar úshin qolaıly áleýmettik orta jasaý oılastyrylǵan.

«Osylaısha joba ınklıýzıvti, tsıfrlyq baǵytta óz jumysyn júrgizedi. Joǵary jyldamdyqty ınternet, GPS, kameramen jabdyqtalǵan smartfon jáne «Jañarym AI» qosymshasy arqyly zaǵıptar kúndelikti turmysta kezdesken tosqaýyldar men qıyndyqtardy op-ońaı sheshe alady. Atap aıtqsaq, jolda adasqan zaǵıp jan qosymshany ashyp, kamerany aınalaǵa baǵdarlaıdy. Al oǵan engizilgen jasandy ıntellekt aldyndaǵy tosqaýyldar men jol júrý belgilerin anyqtap, qoldanýshyǵa aýyzsha habarlaıdy. «Karta-navıgator» tsıfrlyq servısi jol silteıdi», - dedi Azamat.

Eske salsaq, budan buryn qyzylordalyq oqýshy jasandy ıntellektini qazaqsha sóıletti.