Qyzylordalyq polıtseıler esirtki jetkizý arnasynyń jolyn kesti

<p>QYZYLORDA. KAZINFORM - Qyzylorda oblysynyń polıtseıleri esirtki jetkizý arnasynyń jolyn kesti.</p>

Qyzylorda oblystyq Polıtsııa departamenti esirtki qylmysyna qarsy is-qımyl basqarmasynyń qyzmetkerleri jedel-izdestirý is-sharalaryn júrgizdi.

Atalǵan shara barysynda Qyzylorda qalasynda sıntetıkalyq esirtki zatyn saqtaǵan Aqmola oblysynyń 20 jastaǵy turǵyny ustaldy. 

«Ol ornalasqan qonaqúıdegi bólmesine tintý júrgizý barysynda esirtki satýǵa daıyn úsh polıetılen paketine salynǵan sur tústi untaqtar zattaı dáleldeme retinde alyndy. Saraptama qorytyndysymen tárkilengen untaqtyń a-pırrolıdınovalerofenen nemese a-PVP psıhotroptyq zattarǵa jatatyny belgili boldy. Aqmola oblysynyń turǵyny atalǵan sıntetıkalyq esirtki zattaryna ınternet jelisi arqyly tapsyrys qabyldap, Qyzylorda qalasynyń aýmaǵyndaǵy 10 jerge jasyrǵan», - dep málim etti Qyzylorda oblystyq polıtsııa departamentinen. 

Vedomstvo málimetinshe, atalǵan derek boıynsha sotqa deıingi tergep-tekserý áreketteri júrgizilýde. Kúdikti Qyzylorda qalalyq polıtsııa basqarmasynyń ýaqytsha ustaý abaqtysyna qamaqqa alyndy.

Eske salsaq, budan buryn Qyzylorda oblysynda eki adamnyń ólimine sebepker bolǵan kólik júrgizýshisi sottaldy.