Qyzylordalyq áıel máıithanadan 1 mln teńge moraldyq shyǵyn óndirip aldy

<p>QYZYLORDA. KAZINFORM &mdash; Qyzylorda oblysynda jergilikti turǵyn patologııalyq bıýrosynan 1 mln teńge moraldyq shyǵyn óndirip aldy. Jaýapty mekeme turǵynnyń qaıtys bolǵan sábıiniń máıitin shatastyryp, basqa náresteniń máıitin berip jibergen.</p>

Qyzylorda qalalyq sotyna áıel kisi oblystyq patologııalyq bıýro ústinen keltirilgen moraldyq shyǵynnyń ornyn toltyrýǵa talap qoıýǵa baılanysty shaǵymdanǵan.

«Talap qoıýshynyń 4 aılyq qyzy 2023 jyly balalar aýrýhanasynyń jansaqtaý bóliminde qaıtys bolǵan. Sol kúni perınataldyq ortalyqta taǵy bir áıeldiń sábıi óli týylǵan. Olardyń máıitteri máıithanaǵa jetkizilgen.  Talap qoıýshy máıitti berý týraly ótinish bergende, máıithana qyzmetkerleri onyń balasynyń máıitin qatelesip basqa ata-anaǵa berilgenin habarlaǵan. Sońǵysy muny bilmeı, talap qoıýshynyń sábıin jerlegen. Sodan keıin eksgýmatsııa rásimi júrgizilip, qyzdyń denesi talap qoıýshyǵa berilgen», - dep málim etti Qyzylorda qalalyq sotynan.

Mindetterin durys oryndamaǵany úshin máıithana qyzmetkerine qatań sógis berilgen. Bıýronyń bas dárigeri qyzmetinen bosatylǵan.

«Sot atalǵan oqıǵa medıtsınalyq mekeme qyzmetkerleriniń salǵyrttyǵynan oryn alǵanyn rastady. Bul jaǵdaılar talap qoıýshyǵa moraldyq-psıhologııalyq azap pen emotsıonaldyq kúızelis týǵyzdy. Osyǵan baılanysty sot talap qoıýdy qanaǵattandyryp, moraldyq zııandy óteý retinde talap qoıýshynyń paıdasyna patologııalyq bıýrodan 1 mln teńge óndirdi», - dep tolyqtyrdy vedomstvodan.

Eske salsaq, budan buryn messenjerde ekstremıstik jazba taratqan qyzylordalyq áıel 3 jylǵa sottaldy.