Qyzylordada jańa jylý elektr ortalyǵynyń qurylysy bastaldy
Oblys ákimi Nurlybek Nálibaev jańa nysannyń irgetasyn qalaý rásimine qatysyp, qyzylordalyqtardy qos merekemen quttyqtady.
«Memleket basshysy 25 qazan — Respýblıka kúnin „qazaqtyń san ǵasyrlyq memlekettilik dástúri jańǵyrǵan, bostandyq úshin kúresken babalar armany aqıqatqa aınalǵan kún“ dep atap ótip, ótken jyldan beri ulttyq mereke erekshe mánge ıe boldy. Ultymyzdyń erkin ómirge jáne derbes damýǵa umtylysyn pash etetin mereke qarsańynda Syr óńirinde kóptegen ıgilikti ister atqarylýda. Búgin Qyzylorda qalasyndaǵy jańa jylý elektr ortalyǵynyń irgetasy qalanady. Ótken jyldyń tamyz aıynda „Aksa Enerdjı“ kompanııasy men Energetıka mınıstrligi Qyzylordada qýaty 240 megavatt, quny 215 mlrd teńge bolatyn jańa jylý elektr ortalyǵyn salý týraly kelisim-shartqa qol qoıyp, qyrkúıek aıynda kapsýla salý rásimi ótkeninen barlyǵyńyz habardarsyzdar. Bul salada mol tájirıbe jınaqtaǵan „Aksa Enerdjı“ kompanııasy Amerıka, Eýropanyń „Djeneral Elektrık“, „Sımens“ jáne basqa da iri kompanııalaryna sońǵy úlgidegi zamanaýı qondyrǵylardy daıyndaýǵa aldyn ala tólem jasady», — dep atap ótti aımaq basshysy.
Onyń aıtýynsha, búgingi kúnge deıin «Aksa Enerdjı» kompanııasy 76 mlrd teńgeden astam ınvestıtsııa salyp, qazaqstandyq «INTERTASKO» kompanııasyn bas merdiger retinde tańdaǵan.
Jańa stantsııany «kógildir otynmen» qamtamasyz etetin jobanyń merdigeri 16 qarashada anyqtalyp, jyl sońyna deıin qurylys jumystaryn bastaý josparlanǵan.
«Elimiz táýelsizdik alǵaly beri respýblıka aýmaǵyndaǵy jylý elektr óndiretin alǵashqy iri nysan bizdiń aımaqta salynady! Bul Syr eliniń ınfraqurylymdyq damýyna jasalǵan aıryqsha múmkindik ári aqjoltaı jańalyq! Jańa jylý elektr stantsııasy táýelsizdik jyldaryndaǵy ınvestor qarjysyna salynatyn eń aýqymdy, teńdessiz joba ekenin aıtýǵa tıispiz. Jobanyń iske asýyna uıytqy bolǵan Energetıka mınıstrligine jáne múddelik tanytqan „Aksa Enerdjı“ kompanııasynyń basshylyǵyna barsha Syr jurtshylyǵynyń atynan shynaıy alǵysymyzdy jetkizemiz», — dedi Nurlybek Mashbekuly.
Ortalyq 2025 jyldyń tamyz aıynda el ıgiligine berilmek.
Bas merdiger «Samuryq-Qazyna» ulttyq kompanııasynyń tapsyrysy boıynsha 2016-2019 jyldary Atyraý oblysynda qýaty 310 MVt gaz elektr stantsııasynyń qurylysyn júrgizdi.
Sonymen qatar, «Tengızshevroıl», «Shevron», «Nord Kaspıan Opereıtıng» kompanııalarynda jumys atqarýda.