Qyzylordada jalǵan aqparat taratqan jasóspirimder úıqamaqqa alyndy

<p>Qyzylorda polıtsııasy jalǵan aqparat taratqandarǵa qylmystyq jaýapkershilik qarastyrylǵanyn eskertedi, dep habarlaıdy <a href="https://polisia.kz/qyzylorda-politsiyasy-zhalghan-aqparat-taratqandargha-qylmystyq-zhauapkershilik-qarastyrylghanyn-eskertedi/" target="_blank" rel="noopener">Polisia.kz</a>.</p>

Áleýmettik jelide mán-jaıdy anyqtamastan aqparattyń shynaılyǵyna kóz jetkizbeı jalǵan aqparat taratý derekteri oryn alýda. Atap aıtqanda, áleýmettik jelide «Chleny shkolnogo OPG ız Kyzylordy derjalı v seks-rabstve odnoklassnıtsý» taqyrybynda jáne osy istiń aınalasyndaǵy jaǵdaı boıynsha kóptegen shyndyqqa sáıkes kelmeıtin, tekserilmegen jalǵan aqparattar shyǵyp, olar barlyq áleýmettik jeliler arqyly taratylyp otyr.

Jalǵan aqparat tez taraıdy jáne turǵyndardyń arasynda úreı týǵyzady. Bul aqparat shyndyqqa sáıkes kelmeıdi.

«Atalǵan derek boıynsha polıtsııa qyzmetkerlerimen qylmystyq is tirkelip, kámeletke tolmaǵan kúdiktiler ýaqytsha ustaý ızolıatoryna qamalyp, tergeý sotymen kúdiktilerge qatysty úıqamaq bultartpaý sharasy qoldanyldy.

Jábirlenýshi tarap 6 aı kóleminde quqyq qorǵaý organdaryna shaǵymdanbaǵan. Qazirgi tańda is boıynsha tıisti saraptamalar taǵaıyndalyp, istiń mán-jaıy jan-jaqty, tolyq jáne obektıvti túrde júrgizilýde. Kámeletke tolmaǵan adamdy tárbıeleý jónindegi mindetterdi ata-anasynyń oryndamaýyna baılanysty kúdiktilerdiń ata-analaryna qatysty qylmystyq is tirkelip, tergep-tekserý jumystary júrgizilýde», — dep jazdy polıtsııadan.

Qazaqstan Respýblıkasy qylmystyq-protsestik kodeksiniń 201-babyna sáıkes sotqa deıingi tergep-tekserý derekteri jarııa etilmeıdi. 

Sonymen qatar áleýmettik jeliler arqyly kórineý jalǵan aqparat taralýyna baılanysty polıtsııa organymen qylmystyq is tirkelip, qazirgi tańda kúdikti tulǵalardy anyqtaýǵa baǵyttalǵan jedel jumystary júrgizilip jatyr.