Qyzylordada zańsyz ańshylyqpen aınalysqandarǵa qatysty tergeý bastaldy

<p>ASTANA. KAZINFORM &mdash; Qyzylorda oblysynda zańsyz ańshylyq deregine tosqaýyl qoıyldy, dep habarlaıdy Orman sharýashylyǵy men janýarlar dúnıesi komıteti.</p>

RKQ «ÓB Ohotzooprom» jáne orman sharýashylyǵy men janýarlar dúnıesi ınspektsııasy ınspektorlarynyń brakonerlikke qarsy kúres aıasynda júrgizilgen «Kıik» reıdtik is-sharalary barysynda Syrdarııa aýdanynda zańsyz ańshylyqqa kúdikti top anyqtaldy.

Tekserý barysynda Aqshı dep atalatyn jerde eki avtokólik («ÝAZ» jáne «NIVA») toqtatyldy. Kólikterdiń birinen ańshylyq qarý-jaraq, oq-dáriler jáne túngi ýaqytta ańshylyqqa paıdalanylǵan bolýy múmkin jaryqtandyrý quraldary tabyldy. Sonymen qatar, kıik pen qoıannyń deneleri anyqtaldy.

— Oqıǵa ornyna jergilikti Polıtsııa departamentiniń tergeý-jedel toby shaqyryldy. Barlyq ustalǵandar jergilikti polıtsııa bólimine jetkizildi. Tergeý bastaldy, — delingen vedomstvo habarlamasynda.

Eske salsaq, osyǵan deıin Aqmola oblysynda Qyzyl kitapqa engen qustardy aýlaǵan brakoner ustaldy.