Qyzylordada úzdik mektepke 34 mln teńge tabystaldy
Merekelik is-sharada ardager ustaz Álıma Ábdihalyqova Qyzylorda oblysynyń qurmetti azamaty atandy.
Bilikti ustaz bilim salasynda jemisti eńbek etti. Uzaq jyldar boıy Mánshúk Mámetova atyndaǵy Qyzylorda gýmanıtarlyq kolledjiniń dırektory boldy.
Saltanatty shara barysynda «Orta bilim beretin úzdik uıym» oblystyq baıqaýynyń jeńimpazy Á.Músilimov atyndaǵy № 101 mektep-lıtseıge 34 mln teńge tabystaldy.
«Memleket basshysy Qasym-Jomart Kemeluly óz Joldaýynda «Bolashaqqa jol silteıtin muǵalimniń eńbegin laıyqty baǵalaý – mańyzdy mindet» dep erekshe atap ótti. Búgingideı ózgeristerge qadam basqan ýaqytta jas urpaqqa sapaly bilim berip, tárbıeleýde ustazdardyń eńbegi erekshe, mártebesi bıik. Memleket basshysynyń bastamasymen qolǵa alynǵan «Jaıly mektep» ulttyq jobasy aıasynda óńirimizde 100 mlrd teńgege 12 300 oryndyq 21 mektep salynyp jatyr. «Bilimdi qoldaý qory» esebinen 7,9 mlrd teńgege fızıka-matematıka baǵytyndaǵy mektep-ınternat qurylysy qarqyndy júrgizilýde. Jańa oqý jylynda Qyzylorda qalasyndaǵy 4 irgeli mekteptiń janynan qosymsha ǵımarattar paıdalanýǵa berilse, «Báıterek» shaǵyn aýdany turǵyndary asyǵa kútken 600 oryndyq jańa mektep búgin saltanatty túrde ashylyp, el ıgiligine tabystaldy», – dedi N.Nálibaev.
Merekede Syr eliniń úlgili ustazdary QR Oqý-aǵartý mınıstrligi men oblys ákiminiń marapattaryna ıe boldy.
E.Áýelbekov atyndaǵy daryndy balalarǵa arnalǵan № 4 oblystyq mektep-ınternatynyń muǵalimi Ásemkúl Jaqsylyqova «Qazaqstannyń eńbek sińirgen ustazy» qurmetti ataǵymen marapattalsa, pedagogterdiń birqatary QR Oqý-aǵartý mınıstrliginiń «Eńbek ardageri», «Bilim berý isiniń qurmetti qyzmetkeri» qurmetti ataǵyn, Qurmet gramotasyn, «Orta bilim berý isiniń úzdigi» qurmet dıplomyn, oblys ákiminiń Alǵys hatyn aldy.
Saltanatty kesh jergilikti ónerpazdardyń kontsertine ulasty.