Qyzylordada turǵyn úıge qaraqshylyq shabýyl jasap, eki adamdy aýyr jaraqattaǵan kúdikti sottaldy
Bul qylmystyq is Shıeli aýdandyq sotynda qaraldy. Oǵan qatysty QR Qylmystyq kodeksiniń 192-babynyń 3-bóliginiń 4) tarmaǵynda (turǵyn úıge zańsyz kirýmen jasalǵan qaraqshylyq) kózdelgen qylmystyq is qaraldy.
«Sottalýshy buryn aýyr qylmys jasaǵany úshin eki ret bas bostandyǵynan aıyrylǵan. Solaı bola tura sottalǵan QR Qylmystyq kodeksiniń 14-baby 2-bóliginiń 1 tarmaǵynda kózdelgen aýyr qylmysty qaıtalaǵan. Ol jábirlenýshiniń úıine ashana bólmesindegi terezesin kúshtep ashý arqyly kirgen. Sodan keıin jatyn bólmede uıyqtap jatqan jábirlenýshige pyshaq salyp, betin jastyqpen jaýyp tunshyqtyrǵan. Jábirlenýshini uryp-soǵyp, onyń denesine birneshe márte pyshaq jaraqatyn salǵan. Jábirlenýshiniń aıqaılaǵan daýysyn estip kelgen anasynyń keýde tusyna da birneshe márte dál osyndaı qylmystyq áreketin júzege asyrǵan. Odan keıin jábirlenýshilerge tıesili áshekeı buıymdary, uıaly telefon, altyn syrǵasyn alyp, oqıǵa bolǵan jerden boı tasalaǵan», - dep málim etti Shıeli aýdandyq sotynan.
Shıeli aýdandyq sotynyń úkimimen sottalýshy QR Qylmystyq Kodeksiniń 192-baby 3-bóliginiń 4) tarmaǵynda kózdelgen qylmysty jasaǵany úshin kináli dep tanyldy. Sot úkimimen ol 11 jyl 1 aı merzimge bas bostandyǵynan aıyrylǵan. Oǵan jazany óteý orny retinde qylmystyq-atqarý júıesiniń qaýipsizdigi barynsha joǵary mekemesi belgilengen.
Eske salsaq, budan buryn Qyzylorda oblysynda bıyl beınekameralardyń kómegimen 122 qylmys ashyldy.