Qyzylordada probatsııa esebindegi 52 azamat kvotamen jumysqa ornalasty
Probatsııalyq baqylaýda belgilengen sottalǵandardy jumysqa turǵyzý sharalary júıeli túrde júrgizilýde.
Jyl basynan probatsııa esebindegi jumyssyz 52 azamat jumysqa ornalastyrylǵan.
Búgin Qyzylorda qalalyq probatsııa qyzmetiniń esebindegi taǵy bir azamat kvotamen jumysqa ornalasty. Ol urlyq babymen sotty bolyp, sot úkimimen 3 jyl 6 aıǵa bas bostandyǵyn shekteý jazasyna kesilip, probatsııalyq baqylaý belgilengen. Túzelý jolyna túsken azamat eki qolǵa bir kúrek tabylǵanyna qýanyp, probatsııa qyzmetkerlerine alǵysyn jetkizdi.
- Tez arada jumys tapqanyma qýanyp otyrmyn. Sottalǵan degendi estigen soń eshkim jumysqa alǵysy kelmeıdi. Shalys basqanymdy moıyndaımyn. Ómir bolǵan soń, qatelespeıtin adam bolmaıdy. Probatsııa qyzmetkerleri psıhologııalyq, quqyqtyq, medıtsınalyq kómekter berip jatyr. Sonymen qosa, sot júktegen mindetterdi túsindirip, quqyqbuzýshylyqqa barmaýymyzdy qatań eskertýde. Jumysymdy jasap, ata -anama, baýyrlaryma kómek bergim keledi, - deıdi eseptegi azamat.
Probatsııa ınspektory ádilet leıtenanty Qaısar Baqytjannyń aıtýynsha qazirgi tańda jumyssyz sottalǵandardy kvota boıynsha jumysqa ornalastyrý júrgizilýde. Qyzylorda qalalyq probatsııa esebinde jumyssyz 79 sottalǵan bolatyn. Onyń 35 kvotamen jumysqa ornalasty.
- Jeke kásipke bet burýǵa nıetti azamattar da bar. Keıbir eseptegi tulǵalar jeke kásibin ashyp, isin dóńgeletip otyr. Jumyssyzdyqtyń aldyn alý boıynsha turaqty túrde jumystar atqarylatyn bolady, - deıdi ádilet leıtenanty Qaısar Baqytjan.