Qyzylordada osal toptaǵy otbasylarǵa 150 páterdiń kilti tabystaldy

<p>QYZYLORDA. KAZINFORM - Konstıtýtsııa kúni qarsańynda oblys ákimi Nurlybek Nálibaev áleýmettik osal toptaǵy otbasylarǵa Qyzylorda qalasynda ornalasqan Jappasbaı batyr kóshesindegi bıýdjet esebinen satyp alynǵan 150 páterdiń kiltin tabystady.</p>

Saltanatty is-sharaǵa Parlament Senatynyń depýtattary Rýslan Rústemov, Naýryzbaı Baıqadamov jáne Májilis depýtaty Marhabat Jaıymbetov qatysty.

Aımaq basshysy baspanaly bolǵan azamattarǵa ıgi tilegin bildirdi.

Foto: Qyzylorda oblysynyń ákimdigi

«Memlekettik qoldaý men ulttyq jobalar aıasynda bıyl qarjylandyrýdyń barlyq kózderinen óńirde 869 300 sharshy metr turǵyn úı paıdalanýǵa beriledi. Sońǵy 2 jylda 4 myńǵa jýyq páter tabystalyp, 17 myń turǵynnyń baspana máselesi sheshildi. Osylaısha turǵyn úı qurylysynyń kólemi 126 paıyzǵa ósti. Memlekettik bıýdjetten bólingen 34 mlrd 100 mln teńgege 2,5 myńnan astam páter beriledi. Óńirde jyl basynan beri 750-den astam otbasy qonys toıyn toılady. Erekshe atap ótý qajet, ótken jyldan beri qalamyzda 7, 9, 12 qabatty turǵyn úıler boı kóterýde. Ózderińizben birge taǵy 150 otbasynyń baspana baqytyna kenelgenine kýá bolyp otyrmyz», – dedi Nurlybek Nálibaev.

Saltanatty sharada Senat depýtaty Naýryzbaı Baıqadamov jerlesterin quttyqtady. Qonystoı ıeleri atynan Gúldana Maıhıeva qýanyshyn jetkizip, qurylys salasynyń ardageri Janábil Nurqyshuly aq batasyn berdi.

Foto: Qyzylorda oblysynyń ákimdigi

Turǵyn úılerdi salǵan merdiger mekeme qyzmetkerlerine oblys ákiminiń Alǵys haty tabystaldy.

Aıta keteıik, páter kiltin alǵandar arasynda jetim, ata-anasynyń qamqorlyǵynsyz qalǵan balalar, áleýmettik jaǵynan osal top ókilderi bar. Páterlerdiń aýmaǵy 40 sharshy metr, olardy satyp alýǵa respýblıkalyq jáne oblystyq bıýdjetten 1 mlrd. 854 mln teńge bólingen.