Qyzylordada oqýshyny jezókshelikke májbúrlegen 8 kúdikti qamaldy
Mınıstrlik Qyzylorda oblysy polıtsııa departamentiniń tergeý basqarmasy kámeletke tolmaǵandardy jezókshelikpen aınalysýǵa tartý faktisi boıynsha Qylmystyq kodekstiń 134-babynyń 3-bóligi boıynsha tergeý júrgizip jatqanyn habarlady.
«Budan basqa, osy qylmystyq is sheńberinde QK birneshe baby boıynsha, onyń ishinde jezókshelikpen aınalysýǵa arnalǵan prıton uıymdastyrý jáne jeńgetaılyq (309-baby 2-bóligi), bopsalaý (194-baby 2-bóligi), esirtki quraldaryn, psıhotroptyq zattardy, olardyń analogtaryn qoldanýǵa kóndirgeni úshin (299-baby 3-bóligi), azaptaý úshin (110-baby 1-bóligi), kámeletke tolmaǵan balany tárbıeleý jónindegi mindetterdi oryndamaǵany úshin (140-baby 1-bóligi) tergeý júrip jatyr», - dep jaýap berdi mınıstrlik redaktsııanyń resmı suraýyna.
Sondaı-aq, osy faktiler boıynsha 8 kúdiktige sot «qamaýda ustaý» túrindegi bultartpaý sharasyn tańdady, bireýi úıqamaqta.
Budan basqa, osy fakti boıynsha jaýapty laýazymdy tulǵalarǵa qatysty júrgizilgen qyzmettik tergeý nátıjesinde Qyzylorda oblysy PD birqatar qyzmetkerleri qatań tártiptik jaýapkershilikke tartylǵan.
Eske salsaq, Qyzylorda qalasynda mektep oqýshylary «synyptasyn seks-quldyqta ustady» degen kúdikke ilindi.
Bir top jasóspirim 16 jasar qyzdy qınap ustaǵany, esirtki berip, jezókshelikpen aınalysýǵa májbúrlegeni týraly aqparat tarady.
Oqýshy qyzdyń ata-anasy jaǵdaıdy qoǵamdyq qorǵa habarlaǵan.
Qyzylorda polıtsııasy atalǵan derek boıynsha kúdiktilerdi ustap, ýaqytsha ustaý ızolıatoryna qamady. Keıin kúdikke ilingen mektep oqýshylary úıqamaqqa aýystyryldy.
Oqıǵaǵa baılanysty №7 mektep-lıtseı dırektory, tárbıe isi jónindegi orynbasary, psıhology, áleýmettik pedagogi, synyp jetekshileri jumystan bosatyldy.
Bul jaǵdaıǵa sondaı-aq Oqý-aǵartý mınıstri Ǵanı Beısenbaev pikir bildirgen bolatyn.