Qyzylordada oqýshyny seks quldyqqa salǵan kúdiktilerdiń beseýi — jasóspirim

<p>ASTANA. KAZINFORM — QR Іshki ister mınıstrliginiń baspasóz qyzmeti qyzylordalyq oqýshyny jezókshelikke májbúrleýge qatysty atyshýly isti tergeý qalaı júrip jatqanyn aıtty. Vedomstvonyń habarlaýynsha, kúdikti dep tanylǵan 11 adamnyń beseýi kámelet jasyna tolmaǵan.</p>

Qyzylorda oblysynyń polıtsııa departamenti kámeletke tolmaǵandardy jezókshelikpen aınalysýǵa tartý faktisi boıynsha qylmystyq isti tergeýde.

Buǵan qosymsha kámeletke tolmaǵandardy jezókshelikpen aınalysýǵa tartý; jezókshelikpen aınalysý úshin prıtondardy uıymdastyrý nemese ustaý jáne jeńgetaılyq; bopsalaý; esirtki quraldaryn, psıhotroptyq zattardy, olardyń analogtaryn qoldanýǵa kóndirý; azaptaý; kámeletke tolmaǵan balany tárbıeleý jónindegi mindetterdi oryndamaý boıynsha qosymsha ister qaralýda.

«Qylmystyq isterdiń 9 qatysýshysy qamaýda otyr, al ekeýine „úıqamaqqa alý“ bultartpaý sharasy tańdaldy, onyń ishinde kámeletke tolmaǵandar sany — 5. Sonymen qatar, istiń mán-jaıy boıynsha jábirlenýshiden jaýap alyndy. Sot tyńdaýy jáne ashyq sot talqylaýy máselesi sottyń quzyretinde», — dep jazylǵan mınıstrlik jaýabynda.

Eske salsaq, bıyl tamyz aıynda Qyzylorda qalasynda mektep oqýshylary synyptasyn seks-quldyqta ustady degen kúdikke ilindi.

Bir top jasóspirim 16 jasar qyzdy qınap ustaǵany, esirtki berip, jezókshelikpen aınalysýǵa májbúrlegeni týraly aqparat tarady. Oqýshy qyzdyń ata-anasy bul jaǵdaıdy qoǵamdyq qorǵa habarlaǵan.

Qyzylorda polıtsııasy atalǵan derek boıynsha kúdiktilerdi ustap, ýaqytsha ustaý ızolıatoryna qamady. Keıin kúdikke ilingen mektep oqýshylary úıqamaqqa aýystyryldy.

Oqıǵaǵa baılanysty № 7 mektep-lıtseı dırektory, tárbıe isi jónindegi orynbasary, psıhology, áleýmettik pedagogi, synyp jetekshileri jumystan bosatyldy.

Tamyz aıynyń sońynda Qyzylordada oqýshyny jezókshelikke májbúrlegen 8 kúdikti qamalǵany habarlanǵan edi.

Bul jaǵdaıǵa Oqý-aǵartý mınıstri Ǵanı Beısenbaev ta pikir bildirgen.