Synyptasyn jezókshelikpen aınalysýǵa májbúrlegen: Qyzylordada oqýshylar kúdikke ilindi

<p>ASTANA. KAZINFORM — Qyzylorda qalasynda mektep oqýshylary «synyptasyn seks-quldyqta ustaǵan» dep kúdikke ilindi. Bul týraly qoǵamdyq qorǵa jábirlenýshiniń ata-anasy málim etken. </p>

Al oqýshynyń «seks-quldyqta júrgenin» onyń dosy anyqtaǵan.

«Ol qyz — úıdiń jalǵyz balasy. Aqpan aıynan beri úıge kelmeýdi shyǵarǵan. Áke-sheshesi polıtsııaǵa habar beredi, biraq polıtsııa qyzdy izdeýdiń ornyna ata-ana quqyǵynan aıyramyz dep qorqytýmen bolǵan. Sharasyz áke men sheshe qyzyn ózderi izdegen. Qyz anda-sanda baılanysqa shyǵyp turǵan. Birde «kafede daıashy bolyp júrmin», birde «gúl dúkeninde satýshy bolyp istep júrmin» dep vıdeo jiberip otyrǵan. Áke-sheshesi sol meken-jaıǵa barsa, qyz joq bolady. Qyzdy qınap ustaǵandar ata-anasy shý kótermesin dep osylaı isteýge májbúrlegen», — dep jazdy qoǵamdyq qordyń jetekshisi Dına Tańsári.

Anasynyń jazǵan hatynda baıandalǵandaı, mektep oqýshylary «aıtyp qoısań, Astanadaǵy «kókelerimizge aıtyp áke-shesheńdi óltirtemiz» dep qyzdy qorqytqan. Ata-anasy úshin qatty qoryqqan jábirlenýshi basyndaǵy jaǵdaıdy ashyp aıta almaǵan. Tek kezekti ret aqsha bopsalaǵanda mán-jaıdy dosyna málimdeýge májbúr bolǵan.

Qor belsendisiniń jazýynsha, oqýshy qyz balaǵa synyptastarynyń qınap esirtki berip, zorlap júrgenin mektep dırektory, muǵalimderi, ýchaskelik polıtsııa da bilgen. Biraq bári biraýyzdan ún shyǵarmaı otyrǵan, eshqandaı shara da qoldanbaǵan.

«Qyzylorda polıtsııasy atalǵan derek boıynsha kúdiktilerdi ustap, ýaqytsha ustaý ızolıatoryna qamady. Qazirgi tańda is boıynsha tıisti saraptamalar taǵaıyndalyp, tergeý jalǵasyp jatyr. QR QPK-niń 201-babyna sáıkes ózge aqparat tergeý múddesine oraı jarııa etilmeıdi. QR Konstıtýtsııasynyń 77-baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady», — dep habarlady Qyzylorda oblystyq Polıtsııa departamentiniń baspasóz qyzmetinen.

Al, Bala quqyqtary jónindegi ýákil Dınara Zakıeva dál osy jaǵdaı boıynsha áleýmettik jelidegi paraqshasyna jazyp, qylmystyq is qozǵalǵanyn, bul oqıǵanyń nazarda ekenin habarlady.

«Qyzylorda oblysyndaǵy jaǵdaıǵa qatysty aıtar bolsam, atalǵan fakt boıynsha qylmystyq is tirkeldi. Qazirgi tańda tergeý sharalary júrgizilip jatyr, sot-saraptamalyq ekspertıza jasalyp jatyr. Keshe maǵan jábirlenýshiniń tátesi habarlasty. Atalǵan is boıynsha QR ІІM-men birlesip, jaýapty organdarmen birge jumys jasap jatyrmyz», — dep jazdy Dınara Zakıeva.