Qyzylordada munaı ónimderin zańsyz satýmen aınalysqan seriktestik dırektory sottaldy

<p>QYZYLORDA. KAZINFORM - Qyzylorda oblysynda iri kólemde munaı ónimderin zańdylyǵyn rastaıtyn qujatsyz satyp alyp, saqtap jáne satýmen aınalysqan seriktestik dırektoryna qatysty sot úkimi shyqty</p>

Oblystyq Ekonomıkalyq tergep-tekserý departamenti tarapynan iri kólemde munaı ónimderin zańdylyǵyn rastaıtyn qujattarsyz satyp alyp, saqtap jáne satýmen aınalysqan seriktestik dırektorynyń áreketi áshkere boldy.

- Qyzylorda qalasynda turatyn azamatsha 2018 jyly munaı ónimderin kóterme baǵada satý úshin seriktestik dırektory jáne quryltaıshysy retinde taǵaıyndaldy. Negizgi qyzmeti munaı ónimderin kóterme satý bolyp tabylatyn kompanııany basqarǵan kúdikti 2019-2023 jyldar aralyǵynda 16 túrli kompanııadan jalpy somasy 574 mln teńgeden astam qarjyǵa 2 422 tonna dızel otynyn satyp alǵan. Ol rastaıtyn qujatsyz satyp alǵan 334 tonna dızel otynyn 18 memlekettik mekeme jáne 3 zańdy tulǵaǵa 262 mln teńgeden astam aqshaǵa ótkizgen. Saldarynan qylmystyq jolmen tapqan 262 mln teńgeni zańdastyrǵan. Qylmysy úshin sot ony QR Qylmystyq kodeksiniń 197-baby 4-bóligi 2-tarmaǵymen, 218-baby 3-bóligi 3-tarmaǵymen kináli dep tanydy. Oǵan shartty túrde 5 jyl bas bostandyǵynan aıyrý jazasy taǵaıyndaldy, - dep atap ótti departamentten.

Vedomstvo málimetinşe, eki jyl kóleminde departament boıynsha osyǵan uqsas 3 is tirkeldi. Atalǵan isterdiń óndirisi aıaqtalyp, sotqa joldanǵan.

Eske salsaq, budan buryn Qyzylorda oblysynda alaýyzdyq týdyratyn jazba taratqan turǵyn sottaldy.