Qyzylordada ken ornynda kóz jumǵan marqumnyń otbasyna moraldyq shyǵyn tólenedi

<p>QYZYLORDA. KAZINFORM - Qyzylorda oblysynda ken ornynda jumys ýaqytynda qaıtys bolǵan marqumnyń áıeli kompanııadan 6 mln teńge moraldyq shyǵyn óndiretin boldy.</p>

Marqum jergilikti aktsıonerlik qoǵamnyń birinde operator qyzmetin atqarǵan. Qyzylorda qalasynyń turǵyny jumys ýaqytynda ken ornynda qaıtys bolǵan.

Bul maqsatta oblystyq eńbek salasyndaǵy baqylaý basqarmasy tekserý júrgizdi. Mamandar qorytyndyǵa sáıkes, jazataıym oqıǵa eńbek mindetterin oryndaý kezinde bolǵan degen tujyrymǵa keldi. Jumys berýshiniń kinási tolyqtaı dáleldendi.

Qaıtys bolǵan jumysshynyń artynda áıeli men kámeletke tolmaǵan úsh balasy qalǵan. Asyraýshysynan aıyrylǵan áıel Qyzylorda qalalyq sotyna júginip, moraldyq zııan óndirýdi suraǵan.

«Sotta aktsıonerlik qoǵam marqumnyń otbasyna kómek berilip, saqtandyrý shartyna sáıkes marqumnyń áıeliniń esepshotyna aqsha aýdarylǵanyn kórsetti. Sot otyrysynda barlyq dáleldeme zerdelendi. Jumys berýshiniń kinásinen otbasynyń jalǵyz asyraýshysy bolǵan jumysshynyń qaza tapqany anyqtalǵan. Qyzylorda qalalyq soty áıeldiń talap qoıýyn qanaǵattandyryp, aktsıonerlik qoǵamnan áıeldiń paıdasyna 6 mln teńge moraldyq zııan óndirý týraly sheshim shyǵardy», - dep málim etti Qyzylorda qalalyq sotynan.

Eske salsaq, budan buryn Qyzylorda oblysynda zańsyz mazýt satqan eki kásipker jazaǵa tartyldy.