Qyzylordada qalanyń birqatar bóligi jaryqsyz qaldy

<p>QYZYLORDA. KAZINFORM &mdash; Qyzylordada transformatordyń janýy saldarynan qalanyń birqatar bóligi jaryqsyz qalyp, ol birshama ýaqyttan keıin qalpyna keltirildi.</p>

Oblystyq tótenshe jaǵdaılar departamentiniń habarlaýynsha, oqıǵa 3 jeltoqsanda saǵat 14:24-te Qyzylorda qalasy «Sol jaǵalaý» shaǵyn aýdanyndaǵy «Jańa» qosalqy stantsııasynyń aýmaǵynda boldy. Onda transformatordyń janýy tirkelip, órt saǵat 14:56-da joıyldy. 

— Oqıǵa barysynda qaza bolǵandar men zardap shekkender joq. Órttiń shyǵý sebebi anyqtalýda. Oqıǵa ornynda oblystyq tótenshe jaǵdaılar departamentinen jeke quramnan 30 qyzmetker 5 tehnıkamen jumys jasady. Saǵat 19:23-te KREK AQ qyzmetkerleri jóndeý-qalpyna keltirý jumysyn aıaqtady, — dep atap ótti departamentten.

Sol ýaqytta sol jaǵalaýdaǵy barlyq kóp qabatty turǵyn úı, kásiptik nysandar, oqý oryndary men jataqhana, qurylys nysandarynda jaryq óshirilgen. 

— Oǵan qosa «Muz aıdyny» aýmaǵy, Seıhýn, Demesinov, Otyrar, Mamyr, Baıanaýyl, Baǵlanova, Ajarov kóshelerinde jáne «Araı» móltek aýdanyndaǵy, Nazarbaev, Abaı dańǵyldary boıyndaǵy birqatar kóp qabatty turǵyn úılerde elektr jaryǵy óshirilgen. Keıinnen aqaý qalpyna keltirilip, jaryq qaıta berildi, — dep málim etti óńirlik kommýnıkatsııalar qyzmetinen. 

Eske salsaq, budan buryn Qyzylordada qutqarýshylar aıaǵyna aıyr kirip ketken 7 jasar balany qutqardy.