Qyzylordada erte pisken qaýyn-qarbyzdy jegen 13 adamnyń ishi aýyrǵan

<p>QYZYLORDA. KAZINFORM — Qyzylorda oblysynda merziminen erte pisken jemis-jıdek pen qaýyn-qarbyz jegen 13 adam dárigerler kómegine júgindi.</p>

Oblysta bıylǵy jyldyń 5 aıynyń qorytyndysymen jiti ishek ınfektsııasynyń 349 jaǵdaıy tirkelgen.

Ótken jyldyń osy merzimimen salystyrǵanda 9,1 paıyzǵa tómendeý tendentsııasy baıqalyp otyr. 

«Oblys kóleminde tirkelgen juqpaly jiti ishek aýrýynyń 98 paıyzy Qyzylorda qalasy turǵyndarynan anyqtaldy. Sondaı-aq 89 paıyzy 14 jasqa deıingi balalar arasynda kezdesse, onyń ishinde 68 paıyzy — 2 jasqa deıingi balalar. Mamandar júrgizgen epıdemıologııalyq tekserý nátıjesi boıynsha aýrýdyń basty taralý sebepteri retinde úı jaǵdaıynda daıyndaý tehnologııasy buzylǵan nemese durys saqtalmaǵan taǵamdardy tutyný ekeni belgili boldy. Oǵan qosa mundaı jaǵdaılar sút ónimderi, merziminen erte pisken jemis-jıdekter, qaınamaǵan sý jáne bala kútiminiń nasharlyǵy saldarynan bolǵan», — dedi Qyzylorda oblysynyń sanıtarııalyq-epıdemıologııalyq baqylaý departamenti basshysynyń orynbasary Erlan Uzaqbaev.

Jaz mezgilinde turǵyndar arasynda jiti ishek ınfektsııasy jıi kezdesedi. Sebebi azamattar erte pisken baqsha ónimderi men jemis-jıdekter tutyný barysynda sanıtarlyq talaptardy saqtaı bermeıdi.

Osynyń saldarynan 13 turǵyn merziminen erte pisken jemis-jıdek pen qaýyn-qarbyzdy jegennen keıin ózderin jaısyz sezingen.