Qyzylordada «Anaǵa taǵzym» respýblıkalyq forýmy ótti
Іs-sharaǵa QR Mádenıet jáne aqparat mınıstri, Prezıdent janyndaǵy áıelder isteri jáne otbasylyq-demografııalyq saıasat jónindegi Ulttyq komıssııa tóraǵasy Aıda Balaeva, QR Parlamenti Senatynyń depýtaty Rýslan Rústemov, Májilis depýtaty Marhabat Jaıymbetov, atalǵan komıssııanyń músheleri, belgili qoǵam qaıratkerleri, óńirlerden kelgen delegatsııalar, eńbek ardagerleri, máslıhat depýtattary, kóp balaly analar, ustazdar, oblystyń zııaly qaýymy, qoǵamdyq uıym ókilderi qatysty.
Oblys ákimi Nurlybek Nálibaev forým jumysyna sáttilik tilep, qoǵamdaǵy analardyń rólin erekshe atap ótti.
«Ótken jyly óńirimizge jumys saparymen kelgen Memleket basshysy Qasym-Jomart Kemeluly jańadan ashylǵan «Anaǵa taǵzym» ortalyǵynda boldy. Mundaı ortalyqtardyń jastarǵa tálim-tárbıe berýdegi mańyzyn aıtyp, joǵary baǵasyn berdi. Sonymen qatar, búkil elimizdiń analary bas qosatyn tájirıbe almasý alańynyń jumysyn úılestirýdi tapsyrdy. Prezıdent janyndaǵy áıelder isteri jáne otbasylyq-demografııalyq saıasat jónindegi Ulttyq komıssııamen birlesip, ótken jyldyń qarasha aıynda alǵash ret «Anaǵa taǵzym» respýblıkalyq forýmyn uıymdastyrdyq. Shara qonaqtary bul jıyndy dástúrli túrde ótkizýdi usyndy. Alty Alashtyń anasy – qasıetti Syr óńirindegi taǵylymdy sharanyń jalǵasyn tabýynyń, dástúrge aınalýynyń ózindik sımvoldyq máni bar dep bilemiz. Búgingi forým Ulttyq komıssııamen birlesip uıymdastyryldy. Maqsaty – úıdegi berekeni saqtaýshy, qoǵamdyq-saıası úderisterge belsendi qatysýshy áıel-anany ardaqtaý, erekshe mártebesin qurmetteý sııaqty myzǵymas dástúrli qundylyqtardyń tóńiregine qoǵamdy toptastyrý. Uly Dalanyń uly analarynyń izgi jolyn dáriptep, jas urpaqqa rýhanı-adamgershilik tárbıe berý. Ótkenniń taǵylymyn jańa dáýirdiń talabymen sabaqtastyryp, búgingi qazaq áıeliniń úlgili beınesin qalyptastyrý», – dedi aımaq basshysy.
Іs-sharada QR Prezıdenti janyndaǵy áıelder isteri jáne otbasylyq-demografııalyq saıasat jónindegi Ulttyq komıssııa tóraǵasy Aıda Balaeva áıel-analardyń el damýy men órkendeýine qosqan zor úlesin atap ótti. Olardyń qoǵamdaǵy ornyn, quqyqtary men múmkindikterin keńeıtý memlekettik saıasattyń basym baǵyty bolyp qala beretinin aıtty. Búginde otbasy jáne genderlik teńdik ınstıtýtyn damytýdyń qazaqstandyq modeli aıqyndalǵan 2030 jylǵa deıingi Tujyrymdamany iske asyrý jalǵasýda. Memleket basshysy belgilegen basymdyqtarǵa sáıkes, onyń qyzmeti áıelder men balalardyń quqyqtaryn qorǵaýdaǵy ózekti máselelerdi pysyqtaýǵa shoǵyrlanǵan.
Jıynda Qazaqstannyń eńbek sińirgen qaıratkeri, til janashyry Asyly Osman, Qazaqstan halqy Assambleıasy janyndaǵy respýblıkalyq Analar keńesiniń tóraǵasy Nazıpa Shanaı, respýblıkalyq «Ákeler odaǵy» qoǵamdyq birlestiginiń tóraǵasy Maqsutbek Aıtmaǵanbet, «AMANAT» partııasy Hatshysy Sholpan Karınova jáne jerlesterimiz, belgili telejúrgizýshiler Qymbat Dosjan, Dana Nurjigitova, Qazaqstannyń eńbek sińirgen qaıratkerleri Elena Ábdihalyqova, Elmura Jańabergenova, Jeńis Ysqaqova, Uljan Baıbosynova sóz sóıledi.
Forýmda Aıda Balaeva otbasy qundylyqtaryn únemi nasıhattap, áıelder isteri jáne otbasylyq-demografııalyq saıasatty belsendi iske asyrýǵa atsalysqan qyz-kelinshekterdi marapattady.
Aıta keteıik, Syr óńirinde bul baǵytta aýqymdy jumystar atqarylýda. Demeýshilerdiń qoldaýymen 1 mlrd 700 mln teńgege «Anaǵa taǵzym» ortalyǵy salynyp, halyq ıgiligine berildi, «Otbasy ortalyǵy» óz qyzmetin bastady.
Jyl basy jáne jańarý mezgili – Naýryzdan bastap, ulttyq qundylyqtarymyzdy dáriptep, salt-dástúrlerimizdi nasıhattaý maqsatynda 2024 jyl – «Rýhanııat jyly» dep jarııalanýda. Ataýly jylda tek mádenı-kópshilik sharalar ǵana emes, aýqymdy jobalar júzege asyrylady. Klýbtar men mádenıet úıleri janynan túrli baǵyttaǵy shyǵarmashylyq úıirmelerdi qamtıtyn «Adal adam» rýhanı-mádenı ortalyqtary ashylady. Onda balalar men jasóspirimderge qosymsha bilim, tárbıe beriledi. Syr óńiriniń rýhanııat keńistigindegi bul bastamalar Memleket basshysy usynǵan, ádiletti memleket pen birtutas qoǵamnyń berik negizi sanalatyn «Adal adam» tujyrymdamasyn júzege asyrýǵa zor úlesin qosady.
Bıyl 7 aýdanda neke qııý zaly, kitaphana, mýzeı, arhıv, jastar ortalyǵy, ardagerler men analar úıin biriktiretin «Rýhanııat» ortalyqtary bir mezette salynady. Ol úshin oblystyq bıýdjetten 11 mlrd 500 mln teńge qarjy josparlanýda. Ortalyqtarda aǵa býyn men jastar birlesken jobalardy júzege asyrady, jas býyn úlkenderdiń aqylyn tyńdap, tájirıbe almasady.
Balalar men jasóspirimderdiń shyǵarmashylyǵyn shyńdaý maqsatynda oblys ortalyǵynan «Shyǵarmashylyq akademııasy» salynýda.
Oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııa keshendi sharalar atqarýda. Ótken jyly komıssııa músheleri barlyq aýdandardy aralap, turǵyndarmen kezdesti, psıhologtardyń qatysýymen trenıngter ótkizdi. Analardy qoldaý jáne adal eńbekti nasıhattaý maqsatynda Aýyl áıelderiniń forýmy uıymdastyryldy. Ákeler odaǵy qurylyp, er bala tárbıesine qatysty júıeli sharalar atqarylýda. Oblystyq Ákeler forýmynyń qorytyndysynda belsendi azamattardyń pikir alańy qalyptasty. Barlyq mektepterde Ákeler, Analar keńesteri belsendi jumys jasaýda. Ulttyq komıssııanyń tapsyrmasyna sáıkes oblys ákiminiń otbasy jáne áıelder isteri jónindegi ýákili taǵaıyndaldy.