Qyzylordada alaıaqtyq jasaǵan advokat pen onyń áıeli sottaldy
Qyzylorda qalalyq №2 sotynda QR Qylmystyq kodeksiniń 190-baby 3-bóligi 1-tarmaǵymen, QK-niń 28-baby 4-bóligi arqyly 367-baby 3-bóligi 1-tarmaǵymen aıyptalǵan A. men G-ge qatysty qylmystyq is qaraldy.
«Advokattyq qyzmet kórsetip júrgen A-nyń áıeli G. tanysy M-ny qylmystyq is boıynsha jaýaptylyqtan bosatyp beremin degen sebeppen aldaǵan. Tanysynyń senimin teris paıdalanyp, oǵan qatysty tekserýdi toqtatatynyn aıtqan. Bul úshin sotqa deıingi tergep-tekserýdi bastamaý úshin atalǵan máseleni departamenttiń laýazymdy adamdary arqyly sheship beremin dep ýáde etken. Bul úshin 8 mln teńge para berý qajettigin aıtyp sendirgen», - dáp málim etti Qyzylorda qalasynyń №2 sotynan.
Tanysynyń alaıaqtyq pıǵylynan beıhabar jábirlenýshi M. tekserýdi toqtatý úshin para berýge kelisken. Sol úshin tanysy G-ǵa 5 mln teńgeni qolma-qol sanap bergen.
«Sottalýshylar A. men G. qylmystyq is-áreketin jalǵastyryp, qalǵan 3 mln teńgeni alý úshin taǵy habarlasqan. Bul joly departamenttiń laýazymdy adamdary paranyń qalǵan bóligin surap jatqandyǵyn jalǵan aıtqan. Osylaısha qalǵan aqshany qolma-qol alǵan. Kelesi kezekte olar M-ǵa qatysty tekserýdi toqtatylatynyn aıtyp, aqshany tıisti adamdarǵa bergendigin jetkizgen. Saldarynan advokat pen áıeli alaıaqtyq jolmen qomaqty aqshany qaltaǵa basyp, jábirlenýshige iri múliktik zalal keltirgen. Basty sot talqylaýynda jábirlenýshi M. ózine keltirilgen múliktik shyǵyn qaıtarylǵanyn atap ótti. Sottalýshylarǵa keshirim beretinin, talap aryzdan bas tartatynyn aıtty. Sondyqtan qylmystyq isti qaraýsyz qaldyrýdy suraıtynyn, sottalýshylarǵa jaza máselesi jóninde sottyń quzyryna qaldyratynyn kórsetken», - dep tolyqtyrdy Qyzylorda qalasynyń №2 soty.
Sottalýshylar QR Qylmystyq kodeksniń 190-baby 3-bóligi 1)-tarmaǵymen, QK-niń 28-baby 4-bóligi arqyly 367-baby 3-bóligi 1)-tarmaǵymen kináli dep tanyldy.
«Al Qylmystyq kodekstiń 58-baby 3-bóliginiń talabyna saı onsha qatań emes jazany neǵurlym qatań jazaǵa sińirý arqyly sotty bolǵandardyń árqaısysy túpkilikti memlekettik qyzmette jáne kvazımemlekettik sektor sýbektilerinde laýazymdardy atqarýdan ómir boıyna aıyryldy. Sondaı-aq olarǵa 7 jyl merzimge bas bostandyǵynan aıyrý jazasy taǵaıyndalyp, jazalaryn qylmystyq-atqarý júıesiniń ortasha qaýipsiz mekemelerinde óteýge belgilendi», - dep atap ótti atalǵan vedomstvodan.
Eske salsaq, budan buryn Qyzylordada asa iri kólemde alaıaqtyq jasap, qashyp ketken adam qolǵa tústi.