Qyzylordada alaıaq elden jınap alǵan 250 mln teńgesin kazınoǵa jumsaǵan

<p>QYZYLORDA. KAZINFORM &ndash; Qyzylorda oblysynda tanystaryna jalǵan aıtý arqyly 250 mln teńgeni aldap alyp, ony kazıno oıyndaryna jumsaǵan azamat sottaldy.</p>

Sottalýshy kásipkerlikpen aınalysatyn tanystarynda qomaqty qarajat bar ekenine kóz jetkizip, olarǵa túrli tenderge qatysýǵa usynys bildiredi.

Sol arqyly qarajatyn ústemeaqymen qaıtaryp alýǵa múmkindik bar ekenin aıtady. Oǵan ózi kómektesetini týraly jalǵan ýáde berip, jábirlenýshilerdiń senimine kirgen.

«Osylaısha ol jábirlenýshiniń birinen 47,7, ekinshisinen 62,5, úshinshisinen 80,5, tórtinshisinen 60 mln teńgeni qolhatpen aldap alǵan. Alaıaqtyq áreketimen jábirlenýshilerge múliktik zalal keltirgen. Sottalýshy sot otyrysynda óziniń kinásin ishinara moıyndady. Tender jarııalaýǵa quqyǵy bolmaǵanyn, tek shart resimdeýmen aınalysqanyn aıtty. Jábirlenýshilerden alǵan aqshamen qaryzyn jaýyp, kazıno oıyndaryna jumsaǵanyn kórsetti», - dep málim etti oblystyq sottan.

Jábirlenýshiler shyǵynnyń qalpyna kelmegenin aıtyp, oǵan bas bostandyǵynan aıyrý túrindegi jazasyn taǵaıyndaýdy surady.

Sottalýshy shyn nıetpen ókinetinin jetkizdi. 

«Ol QR Qylmystyq kodeksiniń 190-baby 4-bóligi 2-tarmaǵymen kináli dep tanyldy. Oǵan 6 jyl 6 aı merzimge bas bostandyǵynan aıyrý jazasy taǵaıyndaldy. Jábirlenýshilerdiń materıaldyq zalal óndirý týraly talap qoıýy qanaǵattandyryldy. Úkim zańdy kúshine endi», - dep tolyqtyrdy vedomstvodan.

Eske salsaq, Qyzylordada ónimge kóńili tolmaǵan tutynýshylarǵa 6,4 mln teńge qaıtaryldy.