Qyzylordada 4-synyp oqýshysy basseınge qulap ketken sábıdi qutqardy

<p>QYZYLORDA. KAZINFORM &ndash; Qyzylorda qalasynda basseınge qulap ketken eki jastaǵy inisin qutqaryp qalǵan 4-synyp oqýshysy Aısultan Husaıynǵa oblystyq tótenshe jaǵdaılar departamenti alǵys bildirdi.&nbsp;</p>

Aısultannyń otbasy aǵaıyndardyń qatysýymen saıajaıda as beredi. Sol jerde eresekterge arnalǵan sýǵa túsetin orynda 2 jastaǵy Hantóre baıqaýsyzda sýǵa túsip ketedi.

Oqıǵanyń barysy jóninde Aısultannyń atasy Husaıyn Qorazbaev baıandap berdi. 

«Ata-anasynyń baqylap otyrǵanyna qaramastan 2 jastaǵy Hantóre abaısyzda eresekterge arnalǵan haýyzǵa qulap ketti. Ol sý túbine kete bastaǵan kezde sol jerde turǵan 1-synyp oqýshysy Jansultan aıqaılap, úlkenderdi kómekke shaqyrady. Sol sátte Aısultan dereý sýǵa sekirip, Hantóreni qutqaryp qaldy. Balalarǵa arnalǵan úrlemeli ballonǵa salyp jaǵaǵa alyp shyǵyp, sol jerge kelgen ata-anasynyń qolyna tabystady. Ýaqtyly, dál, sapaly kórsetilgen kómektiń arqasynda kishkentaı Hantórege medıtsınalyq kómektiń qajeti bolmady», - deıdi H. Qorazbaev.

Aısultan – toǵyz jasta, egizdiń syńary, Ersultan esimdi baýyry bar. Olar – oblys ortalyǵyndaǵy daryndy balalarǵa arnalǵan «Murager» mektebiniń 4-synybynda oqıdy. Ekeýi de oqý ozaty. Sabaqtan tys ýaqytta «Evrazııa» sport kesheniniń júzý sektsııasyna, shahmat klýbyna barady. 

Oblystyq tótenshe jaǵdaılar departamenti Aısultannyń erligin joǵary baǵalap, oǵan alǵys bildirdi.