Qyzylorda jylý elektr ortalyǵy 2025 jyldyń tamyzynda paıdalanýǵa beriledi — Nálibaev ýádesi

<p>Bul týraly &laquo;Jibek Joly&raquo; telearnasynyń &laquo;Ýáde&raquo; baǵdarlamasyna suhbat bergen Qyzylorda oblysynyń ákimi Nurlybek Nálibaev aıtty, dep habarlaıdy <a href="Kazinform." target="_blank" rel="noopener">Kazinform.</a></p>

«Memleket basshysy jylý elektr ortalyǵynyń qurylysyn tezdetip aıaqtap, el ıgiligine tabystaýdy bizge, Úimetke tapsyrdy. Ótken jyly túriktiń «Aksa Enerdjı» kompanııasymen kelisimshartqa otyrǵan edi. Negizi bul nysan jeke ınvestıtsııaǵa salynyp jatyr. Óńirge kerekti 240 megavatt elektr energııasyn shyǵarady. Qalamyzdy tolyq jylýmen qamtamasyz etedi. Jobanyń quny 215 mlrd teńgeni quraıdy», — dedi ol. 

Óńir basshysynyń atap ótýinshe, nysan elimizde jeke qarjyǵa salynyp jatqan eń birinshi jylý elektr ortalyǵy sanalady. 

«Onyń mańyzdylyǵyn eskere kele Memleket basshysy nysan qurylysyn aldaǵy 2 jyldyń ishinde aıaqtap, el ıgiligine berýdi tapsyryp otyr. Biz qazir osy baǵytta jumys istep jatyrmyz. Merdiger ótken jyldan bastap jumysqa qyzý kiristi. Atyraýdyń qurylys kompanııasy JEO nysanyn salatyn boldy. Qazirgi tańda qurylys jumystary bastaldy. Atalǵan kompanııa búginde, Chevron, Siemens syndy úlken kompanııalarmen 76 mlrd teńgege qural-jabdyqtar satyp alý kelisimshartyna qol qoıǵan. Onyń 40 mlrd teńgedeı qarajatyn tólep qoıdy. Biz bul jobany 2025 jyldyń tamyz aıynda aıaqtap, sol jylǵy jylý berý maýsymynda el ıgiligine beremiz dep josparlap otyrmyz», — dedi Nurlybek Nálibaev. 

Onyń dereginshe, óńirge 180 megavatt elektr energııasy qajet. Al jańa JEO 240 megavatt energııa óndiretin bolady. Oblys artylǵan elektr energııasyn basqa óńirlerge satýdy josparlap otyr.