«Qyzylorda-Jezqazǵan» joly: Qyzylordadaǵy 140 shaqyrymǵa jýyq bóligi paıdalanýǵa beriledi

<p>QYZYLORDA. KAZINFORM — Elimizdiń ońtústik jáne soltústik bóligin jalǵaıtyn «Qyzylorda-Jezqazǵan» jolynda qyzý qarbalas tirlik kórinis erip otyr. Qyzylorda oblysy aýmaǵyndaǵy 192 shaqyrym bóliginiń 140 shaqyrymǵa jýyǵy bıyl paıdalanýǵa beriledi.</p>

Atalǵan joba 2020 jyly bastaldy. Oǵan 72,7 mlrd teńge qarjy qaralǵan. Jasalatyn jumys kólemi bes lotqa bólinip, bul boıynsha qytaılyq jáne qazaqstandyq «Qyran» JShS jol salý isin júrgizdi. 

Foto: Nurbolat Nurjaýbaı

QR Kólik mınıstrliginiń Avtomobıl joldary komıteti Ǵylym jáne jumys sapasy basqarmasynyń basshysy Nurtilek Hasenovtiń aıtýynsha, joba boıynsha kúre joldyń Qyzylorda oblysy boıynsha bóligin 2025 jylǵa deıin aıaqtaý josparlanǵan. Qazirgi ýaqytta merdiger kompanııalar joldy abattandyrý, asfalt tóseý sekildi jumystardy júrgizip jatyr.

«Bul aralyqta júrgen jolaýshylar qanshama qıyndyqqa kezikkenin jaqsy bilemiz. Eshqandaı talapqa saı kelmeıtin jol boıynda kólikter talaı márte balshyqqa batyp, ózge de keleńsiz jaǵdaılar boldy. Ózderińiz kórgendeı, endi taspadaı tizilgen tas jol kólik qatynasyn jaqsartyp, jolaýshylarǵa qolaıly jaǵdaı týǵyzady. Kúre joldyń Qyzylorda oblysyndaǵy bóliginde bes kompanııada 700-den astam eńbek etti. Jol salý jumystaryna 400-den astam tehnıka jumyldyrylǵan. Aldaǵy jyly joldyń qalǵan bóligin salýdy josparlap otyrmyz. Qazir qıyrshyq tasty-mastıkalyq polımer asfalt-beton jol qospasyn tóseý qalyp tur. Onyń ózi 130 shaqyrymǵa deıin tóselip bitti», — dedi ol.

Jumys barysynda jol sapasyna basa nazar aýdarylyp otyr. Bul baǵytta tıisti qadaǵalaý organdar tarapynan tıisti is-sharalardy qolǵa alynǵan. 

Foto: Nurbolat Nurjaýbaı

«Kelisim-shart talabyna sáıkes merdigerler bes jyl merzimge kepildik beredi. Jol sapasynyń joǵary bolýyna kóńil bólindi. Óıtkeni, sol ýaqyt ishinde joldan qandaı da bir aqaý tabylsa, ony merdiger óziniń esebinen jabady. Al Ulytaý oblysy jaǵyndaǵy 208 shaqyrymy boıynsha qaıta jańǵyrtý 2025 jyly bastalady dep kútiledi. Uzyndyǵy 400 shaqyrymdy quraıtyn „Qyzylorda- Jezqazǵan“ joly 2027 jyly tolyqtaı eldiń ıgiligine aınalmaq», — dedi QR Kólik mınıstrligi Avtomobıl joldary komıteti «Jol aktıvteri sapasynyń ulttyq ortalyǵy» RMK-nyń bas dırektory Bolatbek Aıtbaev. 

Joldyń sapasyn aldymen mergdigerlerdiń zerthanasy tekseredi. Sondaı-aq álemdik qarjy ınstıtýttarynyń talabyna sáıkes jumys jasaıtyn halyqaralyq ınjenerler de sapa máselesine nazar aýdarady. Oǵan qosa «Jol aktıvteriniń ulttyq sapa» ortalyǵynyń Qyzylorda oblystyq fılıaly da tıisti talaptardy jiti qadaǵalap otyr.

«Qazavtojol» UK Qyzylorda oblystyq fılıaly dırektorynyń orynbasary Ersaıyn Muzafar jol salý barysynda bekitilgen kestege sáıkes jumys júrgizilgen atap ótti.

Foto: Nurbolat Nurjaýbaı

«Aldaǵy ýaqytta kúre jol ońtústik óńirdegi turǵyndardyń áleýmettik-ekonomıkalyq jaǵdaıyna óz yqpalyn tıgizedi. Alǵashqy kezekte jolaýshylar qatynasty jaqsarady. Joldy salý barysynda bul aýmaqta 6 asfalt zaýyty quryldy. Osy kúnge deıin joldyń birqatar aýmaǵynda kólik qozǵalysy uıymdastyryldy. Aldaǵy aıdyń aıaǵyna deıin taǵy 90 shaqyrymy paıdalanýǵa beriledi dep josparlanyp otyr. Qalǵan 50 shaqyrymy aldaǵy jyldyń aıaǵyna deıin aıaqtaımyz degen josparymyz bar», — dedi Ersaıyn Muzafar.