Qyzylorda oblystyq fılarmonııa 20 myń teńgeniń kartınasyn 160 myń teńgege satyp almaq bolǵan

<p>ASTANA. KAZINFORM - Antıkor 55 mlrd teńge bıýdjet qarajatynyń negizsiz jumsalýynyń aldyn aldy.</p>

Sybaılas jemqorlyqqa qarsy qyzmet «Atameken» UKP «Biryńǵaı satyp alý terezesi» aqparattyq júıesi arqyly satyp alynatyn taýarlardyń, jumystar men kórsetiletin qyzmetterdiń josparly baǵalaryn kóterý turǵysynan memlekettik satyp alý men kvazımemlekettik sektordyń satyp alýlaryna monıtorıng júrgizý boıynsha jobany iske asyrýda.

- 2024 jyldyń qorytyndysy boıynsha 55,1 mlrd teńge somaǵa artyq ósýdiń aldyn aldyq, onyń jartysy — 26 mlrd teńge (nemese 47%) bıýdjetke qaıtaryldy. Qalǵan somany tapsyrys berýshiler qaıta qarady. Josparly baǵa tómendedi nemese osy aqsha sheńberinde satyp alynatyn taýar sany ulǵaıdy.

Máselen, SQO-da 230 mln teńgeniń zańsyz jumsalýyna jol berilmedi. Agenttik Petropavlda teledıdar munarasyna arnalǵan jaryqdıodty jabdyqty montajdaý boıynsha jumystardy satyp alý tótenshe jaǵdaımen baılanysty bolmasa da, tótenshe jaǵdaılardy joıý syltaýymen júrgizilgenin anyqtady. Nátıjesinde shart buzylyp, bıýdjet qarajaty qaıtaryldy, - dep jazdy Antıkordan.

Qaraǵandy oblysynda mamandandyrylǵan mýzykalyq mektep-ınternat 9 mln teńgege 18 myń bótelke as sirke sýyn satyp alýdy josparlaǵan, bul mekemeniń qajettiliginen edáýir asyp túsedi (barlyǵy 460 adam). Sonymen qatar, bir bótelkeniń baǵasy 300 teńge naryqtyq qunynan 500 teńgege deıin kóterilgen, bul shyǵyndardy 3,5 mln teńgege arttyrdy. Antıkordyń aralasýynan keıin satyp alý toqtatyldy, al bıýdjet shyǵyny 9 mln teńgege únemdeldi.

- Sol sııaqty, Qyzylorda oblystyq fılarmonııa 300 qabyrǵa sýretin ortasha naryqtyq baǵasy birligine 20 myń teńge bola tura 48 mln teńgege (bir kartınaǵa 160 myń teńgeden) satyp alýdy josparlaǵan. Qunnyń artýy 42 mln teńgeni qurady. Antıkordyń usynysynan keıin satyp alý toqtatylyp, qarajat bıýdjetke qaıtaryldy, - delingen aqparatta.

Sybaılas jemqorlyqqa qarsy qyzmet memlekettik satyp alý salasyndaǵy zańdylyq pen tártipti qamtamasyz etý boıynsha jumysty jalǵastyrýda.

Aıta keteıik, Antıkor buǵan deıin Qazaqstannyń týrızm salasyndaǵy sybaılas jemqorlyqty tekseredi.