Qyzylorda oblysynyń qaldyqtardy óńdeý tájirıbesi basqa óńirlerge úlgi
Oblysta qatty turmystyq qaldyqtardy óńdeýmen 18 kásipkerlik sýbektisi aınalysady. Byltyr 166 myń tonna turmystyq qatty qaldyqtyń 45,7 myń tonnasy nemese 27,5%-y óńdeldi. Oblystyq bıýdjetten bólingen 1 mlrd 700 mln teńgege qaldyqtardy jınaý, tasymaldaý jumystaryn atqaratyn 49 arnaıy tehnıka alyndy.
«Memleket basshysynyń iri qalalarda qatty turmystyq qaldyqtardy qaıta óńdeıtin zaýyttar salý tapsyrmasyna sáıkes, aldaǵy 2 jylda quny 36 mlrd. 400 mln teńgeni quraıtyn 9 jobany iske asyrylady. Atalǵan jobalar aıasynda óńirdiń barlyq aýdandary men Qyzylorda qalasy tolyq qamtylady. Búginde ınvestorlar anyqtalǵan. Aıta ketsek, qaldyqtardy suryptaý jáne óńdeý salasyndaǵy 8 joba «Jasyl damý» aktsıonerlik qoǵamynyń qarjylandyrý mehanızmi arqyly iske asyrylady, 1 jobaǵa oblystyq bıýdjetten 475 mln teńge qaralǵan», — dep atap ótti oblys ákimdiginen.
Jobalar tolyq júzege asqanda 498 turaqty jumys orny ashylady. Jylyna 380 myń tonnadan astam qatty turmystyq qaldyq suryptaý jáne qaıta óńdeýden ótedi. Odan qurylysqa qajetti brýschatka, káriz lıýkteri, qaǵaz, plastık jáne shyny shyǵarylmaq.
«Qazir Qyzylorda qalasynda quny 33 mlrd. teńgeni quraıtyn 2 joba júzege asyrylýda. Onyń biri — qoldanystaǵy polıgondy jańǵyrtý jobasy. Qaldyqtardy usaqtaý jáne órteý qondyrǵylary, 32 arnaıy tehnıka (mýsorovoz, ekskavator, júk tıegish, júk tasymaldaýshy, órt sóndirý, sýarý avtokólikteri), 3 myń evrokonteıner alynyp, medıtsınalyq jáne qurylys qaldyqtary kádege jaratylady. Osylaısha polıgonnyń qaldyq qabyldaý qýattylyǵy 60 myń tonnadan 210 myń tonnaǵa ulǵaıady», — dep tolyqtyrdy oblys ákimdiginen.
Budan bólek, shyny ydystar óndirýde 1 joba iske asyrylady. Joba quny — 29 mlrd. teńge. Qýattylyǵy — jylyna 220 mln shyny ydys. Zaýytqa shıkizat retinde jınalǵan shyny qaldyqtary qoldanylady.