Qyzylorda oblysynyń 98,4 paıyzy ortalyqtandyrylǵan aýyz sý júıesine qosylǵan
Syr óńirinde turǵyndardy taza aýyz sýmen qamtamasyz etý baǵytynda nátıjeli jumystar atqarylyp keledi. Aımaq halqynyń basym bóligi taza aýyz sýǵa qol jetkizip otyr.
Búginde oblysqa qarasty Qyzylorda, Baıqońyr, Aral, Qazaly qalalary ortalyqtandyrylǵan aýyz sýmen tolyqtaı qamtamasyz etilgen. Al, eldi mekenderdiń 98,4 paıyzy ortalyqtandyrylǵan aýyz sý júıesine qosylǵan. Sondaı-aq, oblystaǵy aýyz sý júıesi men onyń sapasy jaqsartý baǵytynda ıgi ister júzege asýda.
Qyzylorda oblysynyń energetıka jáne turǵyn úı-kommýnaldyq sharýashylyq basqarmasy basshysynyń orynbasary Baýyrjan Іzmaǵambetovtiń aıtýynsha, qazir óńirdegi 4 qala men 230 aýyldyq eldi mekenniń 204-i ortalyqtandyrylǵan aýyz sý júıesine qosylǵan. Al, qalǵan 26 eldi mekendi 2025 jyldyń sońyna deıin sapaly aýyz sýmen qamtý boıynsha is-shara jospary bekitildi.
«Sý resýrstary komıteti arqyly Aral aýdanynyń Abaı, Toqabaı, Aqbasty eldi mekenderin «Aral-Sarybulaq» toptyq sý qubyryna qosý qurylystary júrgizilýde. Bıylǵy jylǵa 2 jobany iske asyrý úshin 1,7 mlrd teńge bólinse, aýyz sýmen qamtý jáne sý burý jobalaryna respýblıkalyq bıýdjetten 5,1 mlrd teńge, oblystyq bıýdjetten 351 mln teńge qarjy bólingen. Búginde jobalar boıynsha qurylys jumystary júrgizilýde», - dedi basqarma basshysynyń orynbasary.
Oblys ortalyǵynda qala tutynýshylaryn úzdiksiz aýyz sýmen qamtamasyz etip, káriz sýlaryn burý jáne ony tazartýǵa basa nazar aýdarylýda. Bul baǵytta «Qyzylorda sý júıesi» kásipornynyń teńgeriminde birneshe aýyz sý nysany bar.
«Tasbóget kentinde ornalasqan Bas sý jınaý kesheni arqyly qalanyń ortalyǵy, Tasbóget kenti, Saıahat, SPMK-70, «Sáýlet», «Syrdarııa», «Ippodrom» men temirjol aýdany, qalanyń shetki bólikteri aýyz sýmen qamtylady. Aýyz sý sapasyn kásiporynnyń bazalyq zerthana mamandary kúndelikti tekserip baqylaıdy. Ony qalalyq sanıtarlyq-epıdemıologııalyq basqarmasy qadaǵalaıdy. Al, «Araı» sý alý qurylymyna 2013 jyly qaıta jańǵyrtý júrgizilip, Qyzyljarma ken ornynan 13 aýyz sý uńǵymasy paıdalanýǵa berilgen. Bul sý alý qurylymy, qazirgi tańda «Araı», «Araı-2», «Araı-3» turǵyn aýdany men qalamyzdyń sol jaǵalaýyn aýyz sýmen qamtamasyz etedi. Kásiporyn teńgerimindegi sý alý qurylymdarynyń taza sý jınaý rezervýarlary men qalalyq aýyz sý júıelerine jylyna 2 márte josparly jýý, shaıý jáne zalalsyzdandyrý jumystary júrgiziledi. Qazirgi ýaqytta jospardan tys tazartý, jýý, shaıý jáne zalalsyzdandyrý qolǵa alynyp otyr», - dedi Qyzylorda sý júıesi MKK dırektory Baýyrjan Ábdiqapparuly.
«Aral» salynyp jatqan kásiporyndardyń birlesken dırektsııasy fılıaly osy baǵytta aýqymdy jumystar atqaryp keledi. Atalǵan mekeme 2017 jyldyń 1 maýsymynan bastap elimizdiń Aýyl sharýashylyǵy mınıstrliginiń Sý resýrstary komıteti jáne Qarjy mınıstrliginiń Memlekettik múlik jáne jekeshelendirý komıtetiniń qoldaýymen oblys boıynsha aýyz sýmen qamtamasyz etetin biryńǵaı operator retinde jumys jasaıdy.
«Aral» salynyp jatqan kásiporyndardyń birlesken dırektsııasy fılıaly 6 toptyq sý qubyrlary arqyly Qyzylorda oblysyna qarasty 130 eldi mekendi turaqty túrde sapaly aýyz sýmen qamtamasyz etip keledi. Mundaǵy barlyq toptyq sý qubyrlary boıynsha halyq sany 332 095 adamdy quraıdy. Aýyz sýdyń sapasyn baqylaý barysynda 2023 jyly oqshaý sý júıeleri boıynsha 11 665 synama alynyp mıkrobıologııalyq jáne hımııalyq tekserý analızderi jasaldy.
«Aýyz sý sapasynyń normadan aýytqýshylyq kórsetkishteri 2023 jyly Jalaǵash aýdany boıynsha oryn alyp, uńǵymalarǵa sý sorǵytý, gıpohlorıd kaltsııimen zalalsyzdandyrý jumystaryn júrgizý arqyly qalpyna keltirildi», - dedi «Aral» SJKBD fılıaly dırektorynyń orynbasary Erjan Ámısha.