Qyzylorda oblysyndaǵy mektepke deıingi uıymdarda 500-den astam zań buzý áreketeri anyqtaldy

<p>ASTANA. KAZINFORM - Prokýrorlar mektepke deıingi uıymdarda 500-den astam sanıtarlyq-epıdemıologııalyq jáne órt qaýipsizdigi talaptaryn buzý faktilerin anyqtady, dep habarlaıdy Qyzylorda oblystyq prokýratýranyń baspasóz qyzmeti.</p>

Máselen, Baıqońyr qalasynyń úsh balabaqshasynda tamaq ónimderin (ydys-aıaq, nan taqtasy, shıki kókónister, úı kespesi) mıkrobıologııalyq zertteý nátıjelerimen ishek taıaqshalary anyqtaldy.

Osyndaı derek Syrdarııa aýdanyndaǵy balabaqshalardyń birinde oryn aldy.

Sonymen qatar, Jalaǵash aýdanyndaǵy eki balabaqshada jaramdylyq merzimi ótip ketken kondıterlik jáne sút ónimderi (pechene «ıÝbıleınoe», «Pıoner», qaımaq «Býrenýshka») berilgen.

Shıeli aýdanyndaǵy tórt mektepke deıingi uıym osy kúnge deıin sanıtarlyq-epıdemıologııalyq qorytyndysyz jumys istep kelgen.

Qyzylorda, Baıqońyr qalalary men Syrdarııa, Qarmaqshy jáne Jalaǵash aýdandarynyń balabaqshalarynda dáleldi sebepsiz is júzinde baqshada bolmaǵan balalarǵa qyzmet kórsetý úshin aqy tólengen (aýrýy týraly medıtsınalyq anyqtama nemese aryz bolmaǵan), sonyń saldarynan bıýdjetten 22 mln teńge kóleminde qarjy negizsiz aýdarylǵan.

Syrdarııa aýdanynda jalǵan dıplommen 11 tárbıeshiniń jumys jasaý faktisi anyqtaldy.

«Materıaldar aryzdar men habarlamalardy esepke alý kitabyna tirkelip, tergeý áreketterin júrgizý úshin Syrdarııa aýdanynyń polıtsııa bólimine jiberildi»,-delingen habarlamada.