Qyzylorda oblysynda jergilikti turǵynnan asa iri mólsherde esirtki tabyldy

<p>QYZYLORDA. KAZINFORM - Qyzylorda oblysynyń polıtseıleri jergilikti turǵynnyń úıinen asa iri mólsherde esirtki tapty.</p>

QR Іshki ister mınıstrligi esirtki qylmysyna qarsy is-qımyl departamenti men Qyzylorda oblysy polıtsııa departamentiniń esirtki qylmysyna qarsy is-qımyl basqarmasy jedel izdestirý sharalaryn júrgizdi. Sondaı-aq, oǵan Qarmaqshy aýdandyq polıtsııa bólimi, QR ІІM Ulttyq ulannyń «Búrkit» arnaıy jasaǵy atsalysty.

«Іs-shara barysynda oblys turǵynynan asa iri mólsherde esirtki men qujatsyz qarý tabyldy. Qarmaqshy aýdanynyń turǵynynyń saraıynan 1 qapqa jáne 3 polıetılen paketke salynǵan ózine tán ıisi bar jasyl tústi shóp tárizdes zat tabyldy. Taǵaıyndalǵan saraptama qorytyndysyna sáıkes tárkilengen shóp tárizdes zat salmaǵy 10 keliden astam keptirilgen marıhýana bolyp shyqty. Kúdikti qamaýǵa alynyp, tergeý júrgizilýde», - dep málim etti Qyzylorda oblystyq Polıtsııa departamentinen.

Eske salsaq, budan buryn Qyzylorda oblysynda 11 jyl izdeýde bolǵan qylmysker qolǵa tústi.