Qyzylorda oblysynda jemqorlyqpen baılanysty qylmys jasady degen kúdikpen eki polıtseı ustaldy

<p>QYZYLORDA. KAZINFORM - QR Ulttyq qaýipsizdik komıtetiniń Qyzylorda oblysy jáne Baıqońyr qalasy boıynsha departamenti Qarmaqshy aýdandyq polıtsııa bóliminiń eki qyzmetkerin ustady.</p>

Departament mamandary 19 maýsymda sybaılas jemqorlyq qylmys jasaý deregi boıynsha aýdandyq polıtsııa bólimi mıgratsııa qyzmetiniń mamany T.N men polıtsııanyń ýchaskelik ınspektory J.K-ni qolǵa túsirdi.

21 maýsymda tergeý soty kúdiktilerge qatysty úı qamaǵyna alý túrindegi bultartpaý sharasyna sanktsııa bergen.

«Qazirgi ýaqytta qylmystyq is Qarmaqshy aýdandyq sotynyń qaraýyna usynylǵan. Qazaqstan Respýblıkasy Qylmystyq-protsestik kodeksiniń 201-babynyń talaptaryna sáıkes ózge de derekter jarııa etýge jatpaıdy», - dep málim etti Qyzylorda oblystyq prokýratýrasynan.

Eske salsaq, budan buryn Qyzylorda oblysynda prokýratýra jalǵan dıplommen qyzmet atqarǵan 9 «muǵalimdi» anyqtady.