Qyzylorda oblysynda kene shaqqan 108 adam dáriger kómegine júgindi
Oblysta bıyl keneler kóbirek baıqalǵan 115 eldi meken qolaısyz dep tanyldy. Ótken aıdyń alǵashqy on kúndiginde kenege qarsy zalalsyzdandyrý jumystary bastaldy. Buǵan baılanysty birinshi kezeńi Shıeli, Jańaqorǵan aýdandary men Qyzylorda qalasynda aıaqtaldy. Endi ári qaraı Syrdarııa aýdanynda jalǵasyp jatyr.
Kenege qarsy ýlaý jumystary bastalǵany jóninde oblys turǵyndarynyń uıaly telefon nómirlerine baılanys operatorlary arqyly SMS-habarlamalar joldandy. Bul bastama Tótenshe jaǵdaılar basqarmasymen birlesip bıyl iske qosyldy. Kenege qarsy zalalsyzdandyrý sharalarynyń sapasy men tıimdiligin baqylaıtyn arnaıy jumys toptary quryldy. Quramynda jergilikti atqarýshy organ ókilderi, zoolog-entomologtar, epıdemıologtar bar.
«Elimizdiń ońtústik bóliginde ornalasqan Shymkent qalasy, Jambyl, Qyzylorda jáne Túrkistan oblystary Kongo-Qyrym gemorragııalyq qyzbasy boıynsha tabıǵı oshaqtar ekeni belgili. Oǵan atalǵan óńirlerdiń klımattyq jaǵdaıy qolaıly bolýy – basty sebep. Naýryz aıynan bastap zooparazıtologııalyq toppen kene jınaý, zertteý jumystary júrgizilip jatyr. Búginge deıin 11 979 dana kene jınalyp, 1331 synama zertteýmen qamtyldy. Olardyń arasynda 13-de oń nátıje anyqtaldy. Atap aıtqanda, Jańaqorǵanda 6, Shıeli 4, Jalaǵash 1, Qyzylordada 2 jaǵdaı kezdesti. Jyl basynan beri 108 adam kene shaǵý jaǵdaıymen medıtsınalyq kómekke júgindi. Kongo-Qyrym gemorragııalyq qyzbasyna 2 kúdikti jaǵdaı anyqtalyp, 1 derek zerthanalyq jolmen naqtylandy», - dedi oblystyq Sanıtarııalyq-epıdemıologııalyq baqylaý departamentiniń basshysynyń orynbasary Álııa Ábdiqaıymova.
Eske salsaq, Qyzylorda oblysynda qyzylsha juqtyrǵan turǵyndary sany kóbeıgen.