Qyzylorda oblysynda qarjylyq pıramıda qurǵan azamatsha 5 jylǵa sottaldy

<p>QYZYLORDA. KAZINFORM &ndash; Qyzylordada azamatsha Shagırova kooperatıvtik fılıal ashý arqyly ınternet jelisinde eshqandaı paıyzsyz úı jáne avtokólik alýdy jarnamalap, úgit-nasıhat jumystaryn júrgizip, salymshylardy ózine aqshalaı salym jasaýǵa shaqyrǵan. Bul týraly oblystyq prokýratýranyń baspasóz qyzmeti málim etti.&nbsp;</p>

Onyń qylmystyq áreketiniń saldarynan Qyzylorda qalasynyń 11 turǵynyna 15 mln. teńge kóleminde múliktik zııan kelse, 3 jábirlenýshi 2 avtokóliginen jáne 1 azamat jer teliminen aıyrylǵan, - delingen habarlamada. 

Qyzylorda qalasynyń №2 sotynyń úkimimen azamatsha Shagırova Qazaqstan Respýblıkasy QK-niń 217-baby 3-bóliginiń 2)-tarmaǵymen kináli dep tanylyp, múlki tárkilenip, 5 jyl merzimge bas bostandyǵynan aıyrý jazasy taǵaıyndalǵan.

Óz kezeginde, qastandyq oılaýshylardyń tuzaǵyna túsip qalmaý úshin qarjylyq pıramıdanyń basty belgilerin bilgen durys.

Asa joǵary paıyz, kún saıynǵy kiris jáne ár ertip kelgen adam úshin bonýs usynsa, senip qalmańyz, bul naǵyz qarjylyq pıramıdanyń belgisi.

Búgingi tańda qarjylyq pıramıda qurýshylar tanymal blogerler men juldyzdarǵa jarnama jasatyp, óz qylmystyq áreketterin toqtatpaı otyr. 

Eske sala keteıik, buǵan deıin Shymkentte «Paıyzsyz baspana» qarjylyq pıramıdasyn uıymdastyrǵandar 6 jylǵa sottalǵanyn jazǵan bolatynbyz.