Qyzylorda oblysynda qart maıdangerlerge 2,5 mıllıon teńge beriledi
Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetine súıensek, óńirde ekinshi dúnıejúzilik soǵysqa qatysqan 4 maıdanger bar. Olardyń arasynda eń úlkeni 102 jasqa toldy. Osy oraıda Qyzylorda qalasy, Qazaly jáne Syrdarııa aýdanynyń ákimdikteri Jeńis kúni qarsańynda tólemderdi aýdarý boıynsha jumystardy uıymdastyrýda.Ardagerler 2,5 mıllıon teńge mólsherinde birjolǵy tólem alady.
«Sondaı-aq, Qyzylorda oblysynda 2040-tan astam tyl eńbekkeri bar. Olardyń bireýi «Eren eńbegi úshin» medalimen marapattalǵan. Ekinshi dúnıejúzilik soǵysta qaza tapqan jaýyngerlerdiń 7 jesiri, soǵys kezinde jaralanǵan, kontýzııa alyp, mertikken nemese aýrý saldarynan qaza tapqan múgedek jubaıy ne zaıyby bar 4 adam turady. Uly Otan soǵysyna qatysýshylarǵa jáne soǵys kezinde alǵan jaraqat saldarynan múgedektigi bar adamdarǵa teńestirilgender sany 1894 adamdy quraıdy», - dep málim etti oblys ákimdiginen.
Aımaqta osy sanattaǵy 3964 adam turady. Olardyń barlyǵy 147 680 teńgeden alady. Al «Eren eńbegi úshin» medalimen marapattalǵan tyl eńbekkerine 221 520 teńge tólenbek. Ardagerler sáýir aıynda tólem ala bastady.
Eske salsaq, bıyl elimizde 7 jáne 9 mamyrǵa arnalǵan áskerı sherý ótkizilmeıdi.