Qyzylorda oblysynda eldi mekenderdi kórkeıtý jolǵa qoıyldy
Oblys ákimi Nurlybek Nálibaevtyń tóraǵalyǵymen ótken májiliste eldi mekenderdi kórkeıtý, abattandyrý máseleleri talqylandy. Aımaq basshysy oblys ortalyǵy men barlyq aýdandaǵy atqarylǵan jumystarǵa kúndelikti baqylaýdy kúsheıtýdi tapsyrdy.
Qazirgi demalys maýsymynda kópshilik oryndardyń kelýshilerge yńǵaıly ári jaıly bolǵany jaqsy. Eń bastysy, olardyń taza bolǵany óte mańyzdy. Tazalyq máselesinde turǵyndarǵa júkteletin jaýapkershilikti de umytpaý kerek.
Aıta ketsek, bıyl qala kóshelerin, kópqabatty turǵyn úı aýlalaryn abattandyrý úshin oblystyq bıýdjetten 12,7 mlrd. teńge qaraldy. «Qorqyt ata» áýejaıynyń aýmaǵyn kórkeıtý, qala, kent pen aýyldyq okrýgterdiń 75 kóshesine jaryq baǵanasyn ornatý, 59 kóshege jaıaý júrginshiler jolyn salý josparlanǵan.
Qurylysy ótken jyly bastaý alǵan kópqabatty 19 turǵyn úıdiń aýlasyndaǵy jumystardy aıaqtaý úshin 237 mln. teńge bólingen. Taǵy 25 kópqabatty turǵyn úıdiń aýlasyndaǵy oıyn alańdaryn kúrdeli jóndeý úshin oblystyq bıýdjetten 1 mlrd teńge qaralǵan. Oǵan qosa 215,8 mln teńgege 4 kóppáterli turǵyn úıdiń aýlasy jóndelýde.
Oblys ortalyǵynda 10 zamanaýı aıaldama tolyǵymen ornatyldy. «Halyq qatysatyn bıýdjet» baǵdarlamasy sheńberinde kóshelerge sý jolyn júrgizý, ortalyq zıratty qorshaý, kóppáterli úılerdi abattandyrý qolǵa alyndy.
Qalany kógaldandyrý úshin «Jasyl Qyzylorda» kommýnaldyq memlekettik mekemesi quryldy. Bul jumystar tolyq aıaqtalǵanda, turǵyndar úshin qolaıly orta qalyptasady, jolaýshylar jáne jaıaý júrginshiler qaýipsizdigi qamtamasyz etiledi.