Qyzylorda oblysynda eldi qorqytyp, múlik, aqsha talap etken advokat 5 jylǵa sottaldy

<p>QYZYLORDA. KAZINFORM - Qyzylorda oblystyq advokattar alqasynyń advokaty O.Kýrbanov Jańaqorǵan aýdandyq sotynyń úkimimen 5 jylǵa bas bostandyǵynan aıyryldy, dep habarlaıdy oblystyq prokýratýranyń baspasóz qyzmeti.</p>

Baspasóz qyzmetiniń málimetterine qaraǵanda, sotqa deıingi tergep-tekserý nátıjesi boıynsha tergeý organy O.Kýrbanovqa Qazaqstan Respýblıkasy Qylmystyq kodeksiniń 194-baby 3-bóligi 2-tarmaǵy boıynsha (iri mólsherde múlik alý maqsatynda qorqytyp alýshylyq) aıyp taqty.

Atalǵan qyzmetker birneshe ret iri mólsherde bótenniń múlkin májbúrli túrde talap etken, talaby oryndalmaǵan jaǵdaıda jábirlenýshilerdiń nemese olardyń jaqyndarynyń múddelerine eleýli zııan keltirýi múmkin ózge de málimetterdi taratatynyn aıtqan.

Advokat O.Kýrbanov 13 mekteptiń jáne aýdandyq bilim bóliminiń bas esepshilerinen 6 mln 900 myń teńge talap etip, bermegen jaǵdaıda oblystyq Іshki memlekettik aýdıt departamentine aryzdanatyndyǵyn, odan ári qylmystyq is qozǵalatyndyǵyn, saldarynan aýdannyń abyroıyn túsiretindigin alǵa tartqan.

Sottalǵannyń kinási jınaqtalǵan jáne sot májilisinde jan-jaqty, tolyq, obektıvti baǵalanyp, taǵy da basqa sotta zerttelgen is materıaldarymen tolyq dáleldengen.

Odan ári is apellıatsııalyq satydaǵy sot alqasynda 2024 jyldyń 11 qańtarynda sottalǵan O.Kýrbanov pen onyń advokatynyń shaǵymy negizinde qaralyp, nátıjesimen úkim ózgerissiz, shaǵym qanaǵattandyrýsyz qaldyryldy.

Sot úkimi zańdy jáne negizdi, onyń kúshin joıýǵa nemese ózgertýge negizder joq, dep sot alqasy tapty.

Búgingi kúni sot úkimi zańdy kúshine endi.